|
سبەی ڕۆژئاوای کوردستان پێ دەنێتە قۆناغێکی چارەنووسساز
بەگوێرەی سەرچاوەیەکی ئاگادار، سبەینێ کۆبوونەوەی لوتکە و کۆتایی لە نێوان هێزەکانی سوریای دیموکرات (هەسەدە) و حکومەتی کاتی بە سەرۆکایەتی ئەحمەد شەرع بەڕێوەدەچێت.
سەرچاوەکە ئاشکرای کرد، هەردوولا گەیشتوونەتە ڕێککەوتنێکی گشتگیر کە تێیدا قەوارەی سیاسی و سەربازیی ڕۆژئاوای کوردستان بە فەرمی دەناسرێت.
هەسەدە دەبێتە بەشێک لە سوپا بە مەرجی تایبەت
بەپێی زانیاری ئەو سەرچاوەیە، یەکێک لە گرنگترین خاڵەکانی ڕێککەوتنەکە بریتییە لە:
- هێزەکانی هەسەدە لەژێر ناوی سێ فیرقەی سەربازیی فەرمیدا دەمێننەوە و فەرماندەیی گشتییان لە دەستی مەزلوم عەبدیدا دەبێت.
- دیمەشق مافی دەستوەردانی نابێت لە دانان، لادان یان گۆڕینی هیچ ئەندام و فەرماندەیەکی ئەم سێ فیرقەیە.
- پێکهاتەی ئەمنی و سەربازیی ئێستای هەسەدە وەک خۆی دەمێنێتەوە و تەنها گۆڕانکاری لە جلوبەرگی سەربازیدا دەکرێت بۆ ئەوەی ڕەنگدانەوەی ناسنامەی نیشتمانی نوێی سووریا بێت.
ڕێککەوتنەکە جەخت لەسەر پێدانی لامەرکەزیەتی ئیداریی ڕەها دەکاتەوە، بەو مانایەی کە:
- سەرجەم دامەزراندن و بەڕێوەبردنی کاروباری ناوخۆیی لە ئەستۆی ئیدارەی ناوچەکە دەبێت.
- حکومەتی ناوەندی دانی بە شەرعییەتی سیاسی و کارگێڕی ئەو ناوچانەدا ناوە.
لە ڕەهەندە ئابوورییەکەدا، ڕێککەوتنەکە شێوازێکی نوێی وەبەرهێنان دەخاتە ڕوو:
- پشکی شایستە لە داهاتی نەوت و گاز بۆ ناوچەکانی ڕۆژئاوای کوردستان تەرخان دەکرێت.
- کۆمپانیا نێودەوڵەتییەکان دەگەڕێنەوە بۆ وەبەرهێنان لە کێڵگە نەوتییەکان و قازانجەکان لە نێوان (دیمەشق، هەسەدە و کۆمپانیاکان) دابەش دەکرێت.
- ئەرکی پاراستنی سەربازیی کێڵگەکان هەر لە دەستی هەسەدەدا دەمێنێتەوە.
ئەم ڕێککەوتنە تەنها ناوخۆیی نییە، بەڵکو بەپێی سەرچاوەکە:
- ڕێککەوتنەکە لەسەر ئاستی نێودەوڵەتی و بە چاودێری و گەرەنتی ڕاستەوخۆی ئەمریکا و ئەوروپا تۆمار دەکرێت.
- وەک بەشێک لە گەرەنتییەکان، تورکیا پابەند دەکرێت کە چیتر هیچ جۆرە ئۆپەراسیۆنێکی سەربازی لە دژی هەسەدە ئەنجام نەدات.
بڕوا ستار
بهروار: 25/12/2025
80 جار خوێندراوهتهوه
|