|
سۆسیال دیموکراتەکانیش وەهان
لە سەرەتای هەشتاکاندا قوتابییەکی سۆڤیتی، بە ڕەچەڵەک کۆری، بووە هاوڕێم لەو بەشی ناوخۆییەی تێیدا دەژیام، زۆر جار باسی بارودۆخی عیراق دەهاتە پێشەوە و منیش باسی تەعریب و تەبعیس و ڕاگّواستنی دێهاتەکانی کوردستانم بۆ دەکرد. ڕۆژێکیان گوتی: شیروان ، ئایا دەزانیت ئەوەی تۆ باسی دەکەیت هەمووی لێرە ڕوویداوە؟ تەواوی گرووپگەلێکی ئیتنێکی لە ماوەی شەووڕۆژێکدا لە زێدی خۆیان هەڵکەنراون و وهەزارانیان لێ کوژراون، یان لە برساندا و لە ژێر ئەشکەنجەدا مردوون، بە تایبەتی لە سەردەمی ستالیندا؟ ئەوە یەکەم جار بوو شتێکی لەو بابەتە ببیستم
چەند ساڵێک پاشتر وەک مامۆستای زانکۆ لە لیبیا دەست بەکاربووم ، کوڕێکی موعیدمان لابوو زۆر کوڕی چاک و ڕێکوپێک بوو یارمەتییەکی زۆری من و چەند مامۆستایەکی عیراقیی دەدا و خۆشی دەویستین ، ئەو کوڕە سەر بە '' اللجان الثوریە'' ی قەزافی بوو .کاتێک دوای سێ ساڵ بڕیارم دا لیبیا بەجێ بهێڵم حەزی کرد ئێوارەیەک یەکتری ببینین، پێش ئەوەی سەفەر بکەم . لە کازینۆیەک نزیک گەورەترین گۆڕەپانی شاری طرابلس، کە بە گۆڕەپانی سەوز دەناسرا ، یەکترمان بینی و وردە وردە باس هاتە سەر باسی عیراق و منیش باسی بەندیخانەکان و ئەشکەنجەدانی خەڵکیی و ئیعدامکردنیانم بۆ کرد دوای دادگاییکردنێکی سەرپێیانە و دوور لە هەر هەلومەرجێکی دادپەروانە. پاش کەمێک، بە دەنگێکی نزمەوە پێی گوتم: دکتۆر ، تۆ دەزانی لای ئێمەش هەمان شتە؟! ئایا تۆ دەزانی کە ژێر ئەم گۆڕەپانەی ئێمە ئێستا تیا دانیشتووین ، زیندانێکی گەورەیە، خەڵکی وای تیایە ٢٠-٢٥ ساڵە ڕووناکی خۆریان نەدیوە؟
لە ناوەڕاستی نەوەدەکاندا لە خوێندنگای تەکنیکی شاهانە بۆ ماوەیەک لە گەڵ پرۆفیسۆرێکی سویدیدا کارم دەکرد، ڕۆژێکیان لێی پرسییم : شیروان تۆ بیرت نەکردۆتەوە بگەڕێیتەوە و لە عیراق کاربکەیت؟ منیش باسی ئەوەم بۆ کرد کە لە زانکۆکانی عیراقدا ئەستەنگە کار بکەیت و پێش بکەویت، گەر سەر بە حزبی دەسەڵاتدار نەبیت و منیش ئامادە نییم تەنیا بە مەبەستی کار پەیدا کردن بچمە پاڵ هەر حزبێک. لە وەڵامدا پێی گوتم : جا خۆ لێرەش هەر هەمان شتە، گەر سەر بە سۆسیاڵ دیموکراتەکان نەبێت، مەحاڵە لە بوارەکەتدا پێشکەویت و بەرپرسیارێتی وەرگریت!
باشە کاکە!؟
ئەم یادەوەرییانە ، ئەمڕۆ لە کاتی گفتوگۆکردنمدا لە گەڵ کاک هاشم کۆچانیی هاوڕێمدا هاتنەوە یادم، کە لە ناو شەمەندەفەردا بەرەو ئوپسالە دەرۆیشتین بۆ بەشداریکردن لە مەراسیمی بە خاکسپاردنی بەدریە محەممەد ئەمین( نازەنین) ی خوشکی ئازیزمان.. ڕەنگە دڵتەنگیی هەردووکمان، بۆ کۆچی ناوادەی نازەنین باسەکەی بەو ئاقارە ڕەشبینانەیەدا بردبێت .. لەوانەشە ئەو پرسیارە دەمێک بێت ناخمان بنکۆڵ بکات: ئاخۆ ئەو دادپەروەرییەی وا دەیان ساڵە ئێمە و هەزارانی وەک نازەنین بە پەرۆشییەوەین ، ئەو مرۆڤبوونی مرۆڤەی کە ئاواتی پێ دەخوازین: کەی و لە کوێ دەستەبەر دەبێت؟
٣٠ ئوکتۆبەری ٢٠٢٥
شیروان محەمەد
ستۆکهۆڵم
به‌روار: 31/10/2025
96 جار خوێندراوه‌ته‌وه
|