|
پەنابەرێکی کورد بەچەقۆ کوڕێکی بەریتانی بریندار دەکا
بەپێى گرتەیەکى ڤیدیۆیى کە پۆلیسى بەریتانیا بڵاوى کردووەتەوە، دەردەکەوێت کە گەنجێکى عێراقى هێرش دەکاتە سەر خوێندکارێکى زانکۆ لە شارى بۆرنمۆس و بریندارى دەکات.
گەنجە عێراقییەکە ناوى رێباز محەمەدە و تەمەنى 28 ساڵە، بەپێى گرتەڤیدیۆییەکە و هەواڵى میدیا بەریتانییەکان، سەرەتا محەمەد لەگەڵ سۆلێنت ئەلیس ویلەر قسە دەکات پێى دەڵێت" ئایا هیچ لەبارەى کیک بۆکسێنەوە دەزانیت؟"، و دواتر چەقۆیەک لە گیرفانى دەردەهێنێت و دەیدات لەپشتى و سییەکانى کون دەکات، بەڵام گەنجە بریتانییەکە لە دەستى هەڵدێت.
ویلەر توانى لەدەست گەنجەکە دەربازى ببێت و رابکات، بەڵام دواتر لەهۆشخۆى دەچێت و هاوڕێیەکى پەیوەندى بە پۆلیسەوە دەکات و پۆلیس دەگاتە شوێنى روداوەکە و ویلەر دەگوازنەوە بۆ نەخۆشخانە و بۆ ماوەى پێنج رۆژ لەژێر چاودێریدا هێڵدروەتەوە.
بەپێى ئاژانسەکانى هەواڵ، دواى ماوەیەکى کەم بەسەر روداوەکەدا لە نزیک ئەو شوێنە پۆلیس محەمەد دەستگیر دەکەن و لە لێکۆڵینەوەکانیشدا لەگەڵیدا، گەنجە عێراقییەکە دان بەوەدا دەنێت کە هێرشى کردووەتە سەر ویلەر، پاساوەکەشى ئەوە بووە کە بێهیوابووە لە وەرگرتنى مافى پەنابەرێتى و ژیان لە هۆتێلدا و رێگەى پێنەدراوە کار بکات و ویستویەتى لەو رێگەیەوە دیپۆت بکرێتەوە بۆ عێراق.
روداوەکە لە مانگى مانونى دووەمى ساڵى رابردو رویداوە و دادگاى شارى بۆرنمۆس سزاى شەش ساڵ زیندانى بەسەر محەمەددا سەپاندووە، بەڵام تا ئەم دواییانە گرتەڤیدیۆییەکەى بڵاونەکراوەتەوە.
پارێزەرانی محەمەد ئاشکرایان کردووە کە ئەو گەنجە عێراقییە بە نایاسایی بە بەلەم گەیشتووەتە بەریتانیا.
کەی ئێن ئێن
به‌روار: 10/03/2023
300 جار خوێندراوه‌ته‌وه
|