|
بۆ مێژوو/ گەر ڕاپەڕین نەبوایە خوێن لاشەی دەبرد
گەرچی پێش ڕاپەڕین " شەهید کەمالی ئایشێ قەڵەو" ئاگاداری کردم و زۆریش هەوڵی لەگەڵمدا، بەڵام بەهیچ شێوەیەک بەشداری ڕاپەڕینم نەکردووە.
ئێوارەی 1991.3.7 پاش گیرانی " مونەزەمەی ئەنفالەکە" ی گەڕەکی بەختیاری ، بە سۆراخی دۆزینەوە و دڕاندنی " کەفالەتێکی دایکم " کە ساڵی 1989 سەربازی فیرار بووم و " بە نادیمەن" لە مونەزەی ئەنفالەکە لێیان وەرگرتین، کۆمەڵێک فایلی زۆرم بردەوە.
لە فاییلێکی گەورەدا کۆمەڵێ نامەی فەرمی لە نێوان مونەزەی ئەنفالەکە و شوعبەی بەعسی سلێمانی و " مەکتەب تەنزیم شیمال کە عەلی حەسەن مەجید بەرپرس بوو " و سکرتاریەتی مەکتەبی سەدام حسەین ئاڵوگۆڕ کرابوون .
ڕاپۆرتەکان کە بەرز کرابوونەوە بە سیلسیلەی موراجەعە لە خوارەوە بۆ مەکتەبی سەدام ، ئەمە کورتەکەیەتی:
دیاردەی " موتەخەلیف و فیراری عەسکەری " بە شێوەیەک زۆر بووە ، کە کۆنتڕۆڵ کردنی لە توانا و دەسەڵاتی ئێمەدا نیە.
دوا ڕاپۆرت لە مەکتەبی سەدام و بە ئیمزای خۆی ئەم بڕیارەی دەرکردبوو:
بەم نزیکانە " مەنعەتەجەولێک " لە شاری سلێمانی ڕادەگەیەنین و هەڵمەتێکی گەورە بۆ دەستگیرکردنی " فیرار و موتەخەلیف" بکەن و هاوکاری عەسکەریتان بۆ دەنێرین و دەبێ ئەم بڕیارە وەکو خۆی جێبەجێ بکەن:
بە ژمارەی 10- 15 کەس پێکەوە لەبەردەم مونەزەمەکان ڕەمی بکەن و بۆ هەر کەسێک کەبەشداری ئیعدام کردنەکان دەکات بڕی " 150" دیناریان بدەنێ، هەر حیزبیەکیش ئامادە نەبوو بەشداری ئیعدامەکان بکات، خۆشی ئیعدام بکەن.
ئەم فایلەم دا بە " کاک نەبەزی مامۆستا موحەمەدی " ڕەحمەتی دراوسێمان کە ئێمە پێمان دەووت " نەبەزی نووسرەت خان" .
چونکە ئەمیش لە یەکەم چەکداری ڕاپەڕینی بەختیاری بوو لەگەڵ " شەهید کەمالی ئایشێ قەڵەو و وەستا جەبار" هەم دراوسێ و یەکترمان دەناسی ، هەمیش ڕۆشنبیر بوو.
تێبینی: سێ بەشی گەنجی کورد لەو کاتەدا فیراری جەنگی کوێت بوون، تەنیا لەماڵی خۆماندا 3 برا فیرار بووین
وێنەکە : شەهید کەمالی ئایشێ قەڵەوە بە کۆمەڵێک سەربازی دیلەوە.
شێرزاد عەزیز
مالمۆ
به‌روار: 08/03/2023
503 جار خوێندراوه‌ته‌وه
|