|
وەزارەتی دادی سوید دەڵێ ساڵح موسلیم سویدی بەجێهێشتووە
وەزیری دادی سوید داواکەی تورکیای بۆ دەستگیرکردنی ساڵح موسلیمی ڕەتکردەوە و ڕایگەیاند، ناوبراو سویدی بەجێهێشتووە.
بە گوێرەی هەواڵێکی ماڵپەڕی ڕوسیا تودەی کە لە زاری سیسیلیا رێدسیلیۆس بەرپرس لە وەزارەتی دادی سوید بڵاویکردووەتەوە، سوید داواکەی تورکیای بۆ ڕادەستکردنی ساڵح موسلم هاوسەرۆکی پێشووی پەیەدە بە وڵاتەکەیان ڕەتکردووەتەوە چونکە وەزارەتی داد زانیاری لە پۆلیسی سوید وەرگرتووە کە ساڵح موسلیم سویدی بەجێهێشتووە.
بەرپرسەکە ئاماژەی بەوەشداوە، بەشێوەیەکی ئاسایی داوای ڕادەستکردنی کەسێک لەدوای دەستبەسەرکردنی کەسەکە دێت.
ماڵپەڕەکە ئاشکراشیکردووە، ساڵح موسلیم ڕۆژی ٦ ی ئەم مانگە لەگەڵ ژمارەیەک سیاسەتمەداری سویددا لە پەرلەمانی وڵاتەکە کۆبووەتەوە لە نێویشیاندا، جۆناس چوستیک سەرۆکی پارتی چەپەکانی سوید.
٢٤ی مانگی ڕابردوو ساڵح موسلیم هاوسەرۆکی پێشووی پەیەدە لەسەر داوای تورکیا لە پراگی پایتەختی چیک دەستبەسەر کرا، دوای چەند رۆژێک لە دەستبەسەرکردنی دادگای پراگ بڕیاری ئازادکردنی دەرکرد.
هاوکات دوێنێ مەولود چاوشئۆغلو وەزیری دەرەوەی تورکیا لە کۆنگرەیەکی ڕۆژنامەوانیدا لە ڤێنای پایتەختی نەمسا داوای لە سوید کرد کە ساڵح موسلیم دەستگیربکات.
نالیا
به‌روار: 09/03/2018
1284 جار خوێندراوه‌ته‌وه
|