|
دوو هونەرمەند تابلۆکانى خۆیان لەبەر گوزەرانی خۆیان سووتاند لە سلێمانی
دوو هونەرمەندى شێوەکار لە شارى سلێمانى تابلۆکانى خۆیان سوتاند، وەک دەربڕینى ناڕەزایەتى لە خراپى گوزەران و ڕێزنەگرتنى هونەرەکەیان لە هەرێم.
ئەمڕۆ هەینى کامەران قەرەداغی کەمپێنێکی بە ناوی "تابلۆیەک نانێک ناکات" ڕاگەیاند، تێیدا هەشت لە تابلۆکانی خۆیی سوتاند و بە ئێن ئاڕ تى ٢ى ڕاگەیاند "هەر هونەرمەندێک تابلۆ بەشێکە لە ناخ و هەستی، هەموو شوێن فڵچەیەک ئاسەوارێکی گەورەی ئەوی پیێوە دیارە، بەڵام بێهیواییم لەم وڵاتەدا وایکرد بەشێک لە فیکر و مەعریفەی خۆم بکەم بە خۆڵەمێش".
هەروەها وتیشى: "ئەمڕۆ بەشێک لە تابلۆکانم بردە قەراغی شار و لەوێ لە گۆڕمنا وەکو ئەوەبوو لاشە و جەستەی خۆمم بەجێهێشتبێت".
جەختى لەوەشکردەوە "بۆچون و مەعریفە و ڕۆشنبیری لە ئاستێکدایە کەس وەڵامی نییە، بۆیە مەبەست لەوەی کە بۆچی تابلۆیەک نانێک ناکات ئەوەیە، بۆچی تابلۆیەک ناتوانێت پێنج لیتر نەوت بکڕێت، من لە ئاستی خۆمەوە هەڵوێستی خۆم نواند".
ناوبراو ئاماژەى بۆ ئەوەشکرد، لە دونیادا تابلۆ نرخ و بەهای جوانی خۆی هەیە، من تابلۆکانم زۆر خۆشویست بۆیە سوتاندم، چونکە پێش تابلۆ و پێش هونەر بریتییە لە نان و ئازادی، ئەگەر نان نەبێت بیخۆم چی لە تابلۆیەکی هەڵواسراوی بێ ڕۆح بکەم، تابلۆ دەبێت لە وڵاتێکدا بێت ژیانی تێدابێت".
هاوکات تەیب عەبدولڕەحمان، بووە دووەم کەس کە هەمان کاری دووبارە کردەوەو نۆ تابلۆی خۆی سوتاند و ڕایگەیاند "سوتاندنی تابلۆکان وەك ناڕەزاییەکە لەسەر خراپی دۆخی ئێستای کوردستان لەڕووی سیاسییەوە و بەتایبەتیش لەڕووی هونەری، کە بە تەواوەتی وەلانراوە و گرنگی بە کاری هونەرمەندان نادرێت"
هەروەها وتیشى "دۆخی هونەر و هونەرمەندان بە تەواوەتی لە بارێکی خراپدایە، بۆیە وەك ناڕەزایەتیەک ئێمە بڕیارماندا تابلۆکانمان بسوتێنین".
ئەوەش لەکاتێکدایە بەهۆى دۆخى خراپى هەرێمەوە، ڕۆژانە هاوڵاتیان و مووچەخۆران پەنا بۆ خۆکوشتن دەبەن و حکومەتى هەرێمیش هیچ پلانێکى دڵخۆشکەرى نییە بۆ دەربازکردنى هەرێم لەو دۆخە سەختەى ئابورى.
نالیا
به‌روار: 15/12/2017
634 جار خوێندراوه‌ته‌وه
|