|
ئەسعەد شاوری لای هێزە ئەمنییەکانی سلێمانی دەست بەسەرە
ڕۆژنیوز – سلێمانی
دوای ئەوەی هەواڵی ڕفاندنی چالاکی مەدەنی 'ئەسعەد شاوری' لە تۆڕەکۆمەڵایەتییەکان بڵاوبوویەوە، لە بەدواداچونێکی ڕۆژنیوزدا، دەرکەوت کە ناوبراو لای هێزە ئەمنییەکانی سلێمانییە و ژیانی سەلامەتە.
وەک بڵاوکراوەتەوە، ئەمڕۆ سێ ڕۆژە ئەسعەد شاوری چالاکوانی مەدەنی لە سنووری ئیدارەی ڕاپەڕین بێسەروشوێنە، لەم بارەیەوە سەرچاوەیەکی تایبەت بۆ ڕۆژنیوز دەدوێت.
کەسێکی ئاگادار لە دۆسییەکە کە نەیوسیت ناوی بڵاوبکرێتەوە، بە ڕۆژنیوزی ڕاگەیاند: لەلایەن هێزێکی دژە تیرۆری یەکێتییەوە، پەیوەندیی بە بنەماڵەکەیەوە کراوە کە ناوبراو لای ئەوانەو ژیانی سەلامەتە.
ڕاشیگەیاند: هێزەکە پێیان وتوون، کە چالاکی و خۆپیشاندان نەکەن و دوای ماوەیەکی دیکە ئازادی دەکەن و هەندێک کاری تایبەتیان پێی هەبووە.
لەسەر هۆکارەکەی، سەرچاوەکەی ڕۆژنیوز، وتی: ناوبراو پێشمەرگە بووەو بەهۆی برینداربوونییەوە خانەنشینکراوە، تا خۆشی ئازاد نەکرێت ناتوانین بزانین بۆچی بەوشێوازە دیارنەماوە.
ڕۆژنیوز هەوڵیدا بنەماڵەی ئەسعەد شاوری بدوێنێت، بەڵام ئامادەنەبوون هیچ زانیارییەک لەسەر بابەتەکە بڵێن.
جێگای ئاماژەیە، دیارنەمانی ئەو چالاکوانە، دەنگدانەوەیەکی لەناو چالاکوانان و تۆڕەکۆمەڵایەتییەکاندا دروستکردووەو ناڕەزایەتی توندی بەدوادا هاتووە.
به‌روار: 05/12/2017
1084 جار خوێندراوه‌ته‌وه
|