دەرباز كۆسرەت رەسول: باوكم ژەهراوی بووە
هیڤیدار ئەحمەد و مەحموود یاسین

رووداو - هەولێر

یەكێتی نیشتمانی یەكێك لە سەختترین كاژێرەكانی ژیانی بەڕێ دەكات، كاتێك دوای چلەی تاڵەبانی، جێگری یەكەمی سكرتێری ئەو حیزبە كە ئێستا كەسی یەكەمی یەكێتییە، لە ناكاو نەخۆشكەوت و نەشتەرگەرییەكی قورسی بۆ كرا.

دەرباز كۆسرەت، كوڕە گەورەی كۆسرەت رەسوڵ لە هەڤپەیڤینێكدا لەگەڵ (رووداو) تەواوی چیرۆكی نەخۆشكەوتنی باوكی باس دەكات كە چۆن نەخۆشكەوتووە و چ نەخۆشییەكی هەبووە، ئایا ئیدی دەتوانێ لەكاری سیاسی و بەڕێوەبردنی یەكێتی بەردەوام بێ یان نا؟ 

چۆن نەخۆشكەوت؟

دەرباز كۆسرەت لەگەڵ باوكی بووە كاتێك تەندروستی تێكچووە، دوای زیاتر لە 30 كاژێر لە نەخەوتنی كاتێك لەبەردەم میدیادا دەركەوت بۆ ئەوەی روونكردنەوە بدات لەبارەی دۆخی تەندروستیی باوكی، هیلاكی و خەمباری بەدەموچاوییەوە دیار بوو، ریشی درێژ ببوو، چاوی سوورهەڵگەڕابوو، كاریگەریی نەخۆشكەوتنی باوكی لەسەری ئەوەندە دیار بوو، كاتێ قسەی دەكرد نەیدەتوانی لە شوێنی خۆی بوەستێ. دەرباز كۆسرەت بە (رووداو)ی گوت "باوكم پێش ئەوەی نەخۆش بكەوێ لەگەڵی بووم، لەسەر مەزاری مام جەلال گەڕاینەوە، دایكم بۆ نانی ئێوارە سەروپێی ئامادە كردبوو".

  دەرباز کۆسرەت: باوكم دەگەڕێتەوە نێو سیاسەت و یەكێتی بەڕێوەدەبات

دەرباز كۆسرەت دەڵێت: "باوكم دوای نانخواردن ژەهراوی بوو، ئازاری زۆری هەبوو".

كۆسرەت رەسوڵ لە هەڤپەیڤینێكی پێشوویدا لەبارەی ژیانی تایبەتی خۆی كە رۆژی 2/10/2017 لە هەفتەنامەی (رووداو) بڵاوكرایەوە، باسی ئەو خواردنانە دەكات كە حەزیان لێدەكات، دەڵێت "هەموو جۆرە خواردنێكی كوردەواری دەخۆم".

رۆژێك پێش نەخۆشكەوتنی، كۆسرەت رەسوڵ، سەردانی دوا مەنزڵگەی هەریەك لە مام جەلال، ئیبراهیم ئەحمەد، جەبار فەرمان و رێبازی كوڕی كردبوو.
دەرباز كۆسرەت تەواوی زانیارییەكان لەبارەی نەخۆشییەكەی باوكی تاوەكو گەیەنراوەتە نەخۆشخانەی فاروق لە سلێمانی باس دەكات و دەڵێت: "باوكم چەندین ساڵە كێشەی گەدەی هەیە، كە نەخۆشكەوت یەكەمجار هەوڵماندا بە حەبی موسەكین چارەسەری بكەین، بەڵام كاژێر بووە 3:30ی بەرەبەیان و ئازاری زۆرتر دەبوو، كاژێر بووە 5:00ی بەیانی ئازارەكە لە حەد تێپەڕی و گەیاندمانە نەخۆشخانە. دوای ئەوەی ئەشیعەیان بۆ گرت، نەخۆشییەكە بەدیار كەوت و پزیشكەكان یەكسەر بڕیاریان دا نەشتەرگەری بۆ بكەن".

لە جیهاندا چەند كەس ئەو نەخۆشییەیان هەیە؟

د.رێكەوت حەمەڕەشید، وەزیری تەندروستیی حكومەتی هەرێمی كوردستان، دوای ئەنجامدانی نەشتەرگەرییەكە، لە كۆنگرەیەكی رۆژنامەڤانیدا لە شاری سلێمانی رایگەیاند "جۆری نەخۆشییەكەی گیرانی بۆڕییەكانی ریخۆڵە بوو، تیمێكی پزیشكی بەسەرۆكایەتی دكتۆر قەلەندەر كەسنەزانی، پرۆفیسۆری نەشتەرگەریی كۆئەندامی هەرس و جگەر و چەند پزیشكێكی كارامەی دیكە، توانییان حاڵەتەكە دەستنیشان بكەن و كاری پێویستی بۆ بكەن و توانیشیان نەشتەرگەرییەكی سەركەوتووی بۆ بكەن".

ئەو حاڵەتەی كۆسرەت رەسوڵ تووشی بوو، لە زانستی پزیشكیدا پێیدەگوترێ‌ گانگرینی ریخۆڵە (Acute Mesenteric Ischemia) كە لە ئەنجامی وەستانی كتوپڕی رۆیشتنی خوێن بۆ ریخۆڵە روودەدات.

دەرباز كۆسرەت رەسوڵ دەڵێ "ئەو نەخۆشییە حاڵەتێكی زۆر ناوازەیە، لە دنیادا نزیكەی 500 كەیسی لەو جۆرە نەخۆشییە هەیە و نەخۆشییەكی باو نییە".

 ژەهرخوارد كرابوو؟

دوای نەخوشكەوتنی كۆسرەت رەسوڵ، دەنگۆی ئەوە بڵاوكرایەوە كە ژەهرخوارد كرابێت، ژەهرخواردنی بەرپرسانی كورد هەر لە كۆنەوە قسەی لەسەر دەكرێ. دیارترین رووداو لە رۆژی 24/11/1987 لەناوچەی مەرگە روویدا كە موخابەراتی بەعس هەوڵی كوشتنی ژمارەیەك سەركردەی سیاسی كوردستانی دا كاتێك ژەهری سالیۆم لەلایەن هاوژینی پێشمەرگەیەكەوە كرایە نێو ماستاوەوە لە خوانێكی تایبەت و ئامادەكراو بۆ كۆمەڵێك سەركردە لەوانە (مام جەلال، مەحموود عوسمان، عەدنان موفتی و مستەفا چاوڕەش) و بەهۆیەوە 3 كەس بوونە قوربانی: پێشمەرگەیەك بەناوی بێستوونی مەلا عومەر لەگەڵ خوشك و دایكی مستەفا چاوڕەش، ئەندامی سەركردایەتیی ئێستای یەكێتی. سەركردەكانی دیكەش بۆ وەرگرتنی چارەسەر رەوانەی ئێران و لەندەن كران.
بەڵام دەرباز كۆسرەت دەنگۆی ژەهرخواردكردنی باوكی رەتدەكاتەوە و دەڵێت "راست نییە كە باوكم ژەهرخوارد كرابێ، ئەمە ئەسڵ و ئەساسی نییە".

دەنێردرێتە دەرەوەی وڵات
زەعیم عەلی، ئەندامی مەكتەبی سیاسی پارتی كە بە نوێنەرایەتی مەسعود بارزانی سەردانی كۆسرەت رەسوڵی كرد. لە نەخۆشخانە ئاشكرای كرد كە لە چەند رۆژی داهاتوودا بە فڕۆكەیەكی تایبەت بۆ وەرگرتنی چارەسەر رەوانەی دەرەوەی وڵات دەكرێت.

بەرهەم ساڵح، سەرۆكی قەوارەی هاوپەیمانی بۆ دیموكراسی و دادپەروەری كە دوو رۆژ لەسەر یەك لە نەخۆشخانە بووە و كەسێكی نزیك بووە لە كۆسرەت رەسوڵ، باسی كەسایەتی ئەو دەكات و دەڵێت: "كاك كۆسرەت رەسوڵ كێوێك بووە لە ورە، پێشمەرگە و جوامێر بووە، لای من ئەم سێ خەسڵەتەی كاك كۆسرەت زۆر گرنگترە لەلایەنە سیاسییەكەی، راستە لە رووی سیاسیشەوە كاریگەریی هەبووە".

بەرهەم ساڵح هەروەها دەڵێت "نەخۆشییەكەی بۆ من زۆر ئازارێكی گەورە بوو، بەڵام خۆشبەختانە رەنگ و رووی زۆر خۆش و باشتر بووە". بەرهەم ساڵح هەروەها دەڵێت "ئەم پیاوە ئازایە دەرەقەتی ئەم نەخۆشییە دێ".
  بەرهەم ساڵح:
كاك كۆسرەت كێوێكە لە ورە

سەبارەت بە هەواڵپرسینی سەركردەكان لە تەندورستیی باوكی، دەرباز كۆسرەت دەڵێت "سەركردە عێراقییەكان لەوانەش حەیدەر عەبادی، هادی عامری هەموویان لە رێگەی كاك بەرهەمەوە پەیوەندییان كردووە و لە تەندروستیی باوكمیان پرسیوە".

مستەفا چاوڕەش كە ماوەی سێ‌ خولە لەگەڵ كۆسرەت رەسوڵ لە سەركردایەتی یەكێتییە، بە (رووداو)ی راگەیاند: "كاك كۆسرەت پیاوێكی ئازا و بە قابیلییەتە، ئەمساڵ كاك نەوشیروان و مام جەلال ماڵئاواییان لێكردین. ئەم دوو رۆژەی كاك كۆسرەت نەخۆشە، سەیری ئەو هەموو خەڵكە بكە لە هەموو شار و لادێیەكانەوە هاتوونەتە بەردەم نەخۆشخانە، ئێستا گرنگیی كاك كۆسرەت و هەموو كاكەكانی دیكە دەردەكەوێ".

مستەفا چاوڕەش كە یەكێكە لە هاوڕێ نزیكەكانی كۆسرەت رەسوڵ، هەروەها دەڵێت: "بوونی كاك كۆسرەت لە ناومان هێز و ورەیە، هەر وەكو بوونی مام جەلال بە لاشە مایەی هێز و ورە بوو، كوردستان و یەكێتی پێویستیان بە كاك كۆسرەتە".

دەتوانێ‌ سیاسەت بكات؟

لەبارەی ئایندەی سیاسی كۆسرەت رەسوڵ كە ئایا نەخۆشییەكەی رێگەی پێدەدات بگەڕێتەوە بۆ سیاسەت؟ دەرباز كۆسرەت دەڵێت: "كاك كۆسرەت نە مێشكی، نە دڵی، نە جگەری هیچ كێشەیەكیان نییە و زۆر باشن، بگرە حاڵەتەكەی لەو جۆرە نییە كە نەتوانێ ئیدی سیاسەت بكات". گوتیشی "ئەركی هێشتا تەواو نەبووە و دەبێ یەكێتی دوای مام جەلال بگەیەنێتە كەناری ئارام و كۆنگرە ببەسترێ".

دەرباز كۆسرەت ئاماژەی بەوەدا كە پزیشكەكان بڕیاریان داوە باوكی بۆ ماوەی 72 كاژێر لەژێر چاودێریی چڕی پزیشكیدا بێ و هەر ئەوانیش بڕیاری كۆتایی دەدەن كە كەی دەگەڕێتەوە ماڵ "بەڵام ئەوەی روونە لێرە بێ یان لە دەرەوەی وڵات، هەمان چارەسەری هەیە".

"عێراقی نەگبەت كاك كۆسرەت دەستگیر دەكات"
دوای رووداوەكانی 16ی ئوكتوبەر، كاتێ سوپای عێراق و حەشدی شەعبی هاتنە نێو كەركووك و دەوروبەری، پێشمەرگەكانی سەر بە كۆسرەت رەسوڵ عەلی لە گەڕەكی پیشەسازی رووبەڕووی هێزی حەشدی شەعبی بوونەوە. كۆسرەت رەسوڵ هاتنی هێزی عێراقی بۆ كەركووك بە "داگیركەر" ناوبرد. هەربۆیە حكومەتی عێراق سكاڵایەكی لەدژی كۆسرەت رەسوڵ تۆمار كرد بە تۆمەتی ئەوەی سوپای عێراقی بە داگیركەر ناوبردووە.

مستەفا چاوڕەش زۆر دڵگرانە بەو بڕیارەی عێراق و دەڵێ‌ "ئەگەر عێراق نەگبەت نەبێت كێ دەتوانێت بە خەیاڵیش كاك كۆسرەت دەستگیر بكات، ئەوانەی ئەو بڕیارەیان دەركردووە خەڵكی شۆڤینین و دژی كوردن". گوتیشی "نابێ‌ ئێمە گوێ بەو خەڵكانەی بەغدا بدەین، بەڵكو دەبێ‌ ریزەكانمان یەكبخەین و ناو ماڵی خۆمان چاك بكەین".

تەنیا لەسەر ئاستی ناوخۆ خەڵك و لایەنەكان پەرۆشی دۆخی تەندروستی كەسی یەكەمی ئێستای یەكێتی نەبوونە. دەرباز كۆسرەت دەڵێت "هەموو هێزە سیاسییەكانی كوردستان، وڵاتانی دراوسێ، ئەمریكا و بەریتانیا لە تەندروستیی كاك كۆسرەتیان پرسیوە و گوتیان ئامادەن لە نەخۆشخانەكانیان چارەسەری بكەن".

كوڕە گەورەكەی كۆسرەت رەسوڵ باوكی خۆی وەها پێناسە دەكات "بۆ من هەم باوك، هەم دۆست و هەمیش رەمزێكە و نزیكترین كەسی كاك كۆسرەتم". دەرباز كۆسرەت بەشێكی ناوەڕۆكی پەیوەندیی تەلەفۆنی نێچیرڤان بارزانی، سەرۆكی حكومەتی هەرێمی كوردستان ئاشكرا دەكات و دەڵێت: "كاك نێچیرڤان بارزانی چەند جارێك پەیوەندی بەمنەوە كرد و گوتی زۆر موتەئەسیرم بە نەخۆشكەوتنی كاك كۆسرەت. كاك سیدادیش تەلەفۆنی كرد. كاك عومەری سەید عەلی و تەواوی حیزبەكان هەموو لە نەخۆشخانە بوون، ناتوانین چاكەی خەڵك بدەینەوە، دووبارە قەرزاریان كردینەوە، داوا دەكەم دووعای خێر بۆ كاك كۆسرەت بكەن".
  نێچیرڤان بارزانی:
زۆر موتەئەسیر بووم بە نەخۆشكەوتنی كاك كۆسرەت

نەخۆشییەكەی كۆسرەت رەسول

ئەم نەخۆشییە بە گانگرینی ریخۆڵە ناودەبرێ‌. لە ئەنجامی وەستانی كتوپڕی رۆیشتنی خوێن بۆ ریخۆڵە روودەدات. حاڵەتێكی دەگمەنە. مەترسیدارە بۆ سەر ژیانی كەسەكە ئەگەر زوو چارەسەر نەكرێ. نیشانەكانیشی بریتین لە  سكئێشەی توند، سكچوون. پیسایی خوێناوی.

ئەگەری مردن بەو نەخۆشییە 50% زیاترە بە تایبەتی ئەگەر بووبێتە گانگرین و زۆر زوو چارەسەر نەكرێ. خێرا ئەنجامدانی نەشتەرگەری لە قۆناغە سەرەتاكاندا رێژەی مردن بە راددەی 50-55% كەم دەكاتەوە. ئەو هۆكارانەشی ئەگەری مردن زیاد دەكەن بریتین لە: بەساڵاچوون، سستیی گورچیلە، سستیی جگەر و دابەزینی ئاستی ئۆكسجینی خوێن.
به‌روار:  14/11/2017
4638   جار خوێندراوه‌ته‌وه
  بابه‌تی زیاتر ...
ئەكادیمیای بەدرخان: سەرجەم ژمارەكانی كوردستان لە میسر چاپكراون لە یادی رۆژنامەگەریی كوردیی ئەكادیمیای بەدرخان رایدەگەیەنێت: پاش گەڕان و پشكنینی زیاتر لە ئەرشیفی 50 وڵات ، وای بۆ د درێژه‌ ...
مالمۆکورد یەکەمجارە لەمێژوودا کە ئەنجوومەنی ئاسایشی نەتەوە یەکگرتووەکان لە دەرەوەی بارەگای خۆی لە نیویۆرک کۆبوونەوە بکات. ئیمڕۆ هەیینی 2018.4.20., 15 ئەندامەکەی ئەنجوومەنی ئ درێژه‌ ...
پرسی سوریا تەوەری سەرەکی کۆبوونەوەکانی ئەمڕۆی نەتەوەیەگرتووەکان دەبێت لە هەرێمی سکۆنێ لە سوید. ئەنجوومەنی ئاساییشی ڕێکخراوی نەتەوەیەگرتووەکان کە پێکهاتووە لە ١٥ باڵێۆزی وڵاتان درێژه‌ ...
ستافی ئامادەکاری بەرگی دووەمی کتێبی سەردەشت عوسمان لەبەیاننایەکدا ئاماژە بەوە دەکەن ئاسایشی پارتی لەبازگەی بێستانە دەستی بەسەر ژمارەیەک کتێبی سەردەشت عوسماندا گرتوە، کاتێک لەلایەن درێژه‌ ...
خەڵك- بەشی هەواڵ كۆمیسیۆنی ئەوروپا، بڕیارێكی ئەڵمانیا بۆ وەرگرتنی زیاتر لە 10 هەزار پەنار لە باكووری ئەفریقا و خۆرهەڵاتی ناوەڕاستەوە ئاشكرا دەكات، ئەوەش لە چوارچێوەی پرۆگرامی یەك درێژه‌ ...
لە گروپێکی فەیسبوک دا باوکەکان هاندراون وێنەی سەرنجڕاکێش بە جلوبەرگی تەنک یان وێنەی رووتی ژنەکانیان یان دۆستەکچەکانیان بڵاو بکەنەوە. بە شێوەی ئاسایی لەو گرووپەدا زیاتر باسەکانی درێژه‌ ...
ئەندامێکى سەرکردایەتى حزبى دیموکراتى کوردستانى ئێران ئاشکرایکرد ساڵى ڕابردوو لەلایەن کۆمارى ئیسلامى ئێرانەوە ٣٠٠ کۆڵبەرى کورد کوژراون. ڕۆستەم جیهانگیرى بە ئاژانسى "سپۆتنیک نیوز" درێژه‌ ...
ئوسترالیا ڕاكێشانی‌ دایك و باوك له‌سه‌ر كۆچبه‌ران گران ده‌كات حكومه‌تی‌ ئوسترالیا به‌رده‌وامه‌ له‌ گۆڕینی‌ سیاسه‌ته‌كانی‌ كۆچی‌ ئه‌و وولاَته‌ و له‌ دواهه‌مین گۆڕانكاریدا و به‌گوێره درێژه‌ ...
له‌ شاری دیوانده‌ره‌-ی سه‌ر به‌ سنه‌-ی ڕۆژهه‌ڵاتی كوردستان، پاسدارێكی كۆماری ئیسلامیی ئێران هێرشی كرده‌ سه‌ر خێزانێكی كورد و له‌ ئه‌نجامی ئه‌و هێرشه‌ دڕندانه‌یه‌دا ٤ كه‌سی هه‌مان خ درێژه‌ ...
بڵاو کرایه‌وه‌ kl 17.24 سۆسیال دێموکراتەکان دەیانەوێ یاساکانی هێنانی کرێکار بۆ سوید سنووردار بکەن و زیاتر ئەو کەسانە بێنن بۆ سوید کە لە بازاڕی کاردا خواست لە سەر پسپۆڕیەکەیان هەیە درێژه‌ ...
ژماره‌ی بابه‌ت
مافەکان پارێزراوە بۆ مالمۆکورد
میوانی سه‌رهێڵ:   125
کۆی سه‌ردان:   16604170