|
کوردی سوید لە بارودۆخی کوردستان نیگەرانن
کوردستانیانی سوید بە نیگەرانیەوە دەرواننە گۆڕانکارییەکانی هەرێمی کوردستان، ئەم مژارە لە پانێلێک دا لە ستۆکهۆڵم تاوتوێ کرا.
کوردستانیانی سوید باس لە نیگەرانی و دوودڵیەکانی خۆیان دەکەن سەبارەت بەو دۆخەی کە لە کوردستان هاتۆتە پێش، تارا عەزیزی یەکێک لەوانەی بەشداری ئەو پانێلەی کرد دەڵێ دۆخێکی ناخۆشە و هەمومان هیوایەکی گەورەمان بە ریفراندۆم هەبوو.
شەممەی رابردوو پانێلیکی راوێژکردن لە (ABF) لە ستۆکهۆلم پێکهات ، لەو سیمینارە دا گۆڕانکارییەکانی ئەو دواییەی کوردستان لە لایەن ماگنوس نۆرێل، د.خالید خەیاتی، د.خالید ساڵح و فرێدریک مالمەوە تاوتوێ کرا.
لە پەراوێزی سیمینارەکەدا بەشی کوردی رادیۆی سوید پەرلەمانتار فریدریک مالیمی دواند کە یەکێک لە بەشدارانی ئەو پانێلە بووئەو پێی وابوو کە دۆخەکە لە کوردستان جدییە و سوێد دەبێ باشتر پشتیوانی لە کوردستان بکات، ئەو سەرارەی ئەوەی کە درێژکردنەوەی ماوەی مانەوەی هێزە سەربازییەکانی بە باش لە قەڵەم دا بەڵام پیی وابوو کە هەر ئەوەندە بەس نیە.
لە بەرامبەردا خالید ساڵح سیاسەتزان و نووسەر پێشوازی لە هەر هەوڵیک کرد لە لایەن سویدەوە کە هاوکاری باشترکردنی بارودۆخی کوردستان بکات.
تارا لە داخرانی کوردستانیش بە رووی دنیای دەرەوەدا نیگەرانە و پێی وایە کە گرینگە هاتوچۆ هەبێ بۆ کوردستان، بە تایبەت لە بواری ئابووریەوە، ئەگەر نا ریسکی تەریک مانەوەی کوردستان زۆرە.
خالید ساڵح نیگەرانیەکانی خۆشی ناشارێتەوە و دەڵێ : گۆرانکاریەکان بە ئاراستەیەکی نێگەتیڤ دەرۆن و خەڵک لە بارەی کەس وکاری خۆیان نیگەرانن، کە ئاخۆ چیان بەسەر دێ، ئەو ئاماژە بەوەش دەکا کە ئەوانەی کە گەڕاونەتەوە کوردستان بە ئومێدێکەوە گەراونەتەوە ویستویانە بەشداری ئاوەدان کردنەوەی کوردستان بگرن.
مازن مفتی کە بە ئەنجامدانی ریفراندۆم زۆر خۆشحاڵ بوو ئێستا باس لە نائومێدی خۆی دەکات و دەڵێ زۆرمان پێناخۆشە کە ئەو بارودۆخە هاتۆتە پێش، ماوەیەک پێش ئێستا شاییمان دەکرد بۆ سەربەخۆیی بەڵام ئێستا وەزعەکە گۆڕاوە.
گوێ لە ڕاپۆرتەکە بگرە
به‌روار: 02/11/2017
1066 جار خوێندراوه‌ته‌وه
|