|
چۆن لەدەستبەرداربونەکەی بارزانی تێبگەین؟
توانا عوسمان
ئەمڕۆ بەھۆی شکستەکانی کورد لەناوچە کوردستانیە جێ ناکۆکەکان و بەھۆی ململانێ ناوخۆییەکانی ناو ھەرێمەوە، زۆربەمان ناتوانین ڕووداوی دەستبەرداربوونی بارزانی لەپۆستی سەرۆکی ھەرێم وەک خۆی تێبگەین.
بەشێکمان لەئەوانەی لایەنگری بارزانین ئەم رووداوە بەکۆستکەوتن و بەبۆشایی رۆحی دەبینن، بەشێکی تریشمان لەئەوانەی نەیاری بارزانین خۆشخەیاڵین بەکوژانەوەی ئەستێرەی بارزانیەکان لەجوڵانەوەی سیاسی کوردیدا.
بەڵام لەڕاستیدا ئەم ڕووداوە نە کۆستە نە جەژن، بەڵکو وەرچەرخانێکە لەدیمەنی سیاسی کوردستاندا و دەبێت وەک بەشێک لەبەرەوپێشچوونی دینامیکیەتی سیاسی تەماشای بکەین.
پێش ھەموو شت، دەستبەرداربوونی بارزانی لەپۆستەکەی "سەرباری تێبنیمان لەسەر شەرعیەت و درێژکردنەوەکانی پێشتری ئەم پۆستە" ھەنگاوێکی گرنگە و شایەنی نرخاندنە، چونکە مادام بارزانی ئەیتوانی بمێنێتەوە، مادام ئەیتوانی ڕێگەی تری درێژکردنەوە دابین بکات، مادام لەژێر فشاری ڕاستەوخۆدا ئەو بڕیارەی نەداوە و خۆی لەکاتی ھەڵمەتی ریفراندۆمدا "لەو پەڕی حەماسی نەتەوەیی خۆیدا" دەیوت نامەوێت ببمەو بەسەرۆکی ھەرێم، مانای وایە بارزانی ھەنگاوێکی نا بەئاراستەی پاشەکشێکردن لەقۆڕغکاری دەستەڵات کەساڵانێکە مومارەسەی دەکات.
دەستبەداربوونی بارزانی لەم ساتەوەختە ناسکەدا لەو پۆستە باڵایە "دوای نەمانی مام جەلال و کاک نەوشیروان" چانسێکە بۆ سەرلەنوێ دابەشکردنەوەی دەستەڵات و تێپەڕاندنی کاریزمای سەرکردەی مێژوویی لەکوردستاندا.
ئەوانەی ئەم ھەنگاوەی بارزانی نانرخێنن، لەسیاقی مێژوو تێناگەن و نازانن مەنزومەی دەستەڵات فرە توانایە لەدرێژەدان بەتەمەنی خۆی..
عەبدولعەزیز بۆتەفلیقە "پێشمەرگەی کۆن و سەرۆکی ئێستای جەزائیر" ساڵی ٢٠١٢ کەخۆی بۆ خولی چوارھەمی سەرۆکایەتی جەزائیر ھەڵبژاردەوە، یەک ڕستەی بۆ خەڵکی وڵاتەکەی نەوت و دەریشنەکەوت، چونکە بەئامێر گوێی لەدەنگە و توانای ووتنی چوار ووشەی نیە و لەسەر کورسی ھەمیشەییە و دوو سەکتەی مێشک لێی داوەو ھەردوو گورچیلەشی سستە.
بارزانی کەلە تەندروستیەکی باشدا "وەک لەتەعزێکەی عەلی عەبدووڵادا بینیمان" و بەئیرادەی خۆی "کە بەئاسانی ئەتوانێت جارێکی تریش پۆستەکەی درێژبکاتەوە" وازئەھێنیت، ئەبێت پێشوازی لەم ھەنگاوەی بکەین و لەبری ئەوەی خەریکی شەڕی سایکۆلۆجی پوچ بین لەگەڵی، دەبێت سەرمایەگوزاری سیاسی و فکری لەقۆناغی پۆست بارزانیدا بکەین.
خەندان
به‌روار: 29/10/2017
1635 جار خوێندراوه‌ته‌وه
|