|
ڕێکخراوێکی ژنانی کوردستان بەشداری فێستیڤاڵی هاوڕەگەخوازانی ستۆکهۆڵم دەکا
یەکییەتی ژنانی دیموکراتی کوردستان یەک لەو ڕێکخراوانەیە ئەمساڵ بۆ یەکەم جار بەشداری چالاکییەکانی هەفتەی پرایدی ستۆکهۆڵم دەکات. چنوور فتووحی بەرپرسی کۆمیتەی ستۆکهۆڵمی ڕێکخراوەکە باس لەوە دەکا کە بڕیارەکەیان بۆ بەشداری، هەوڵێکە بۆ پشتیوانی یەکسانی ڕەگەزی و تیشک خستنە سەر ئەو بابەتەی لە کۆمەڵگای کوردیدا هەستیارە.
لە ماڵی کولتوری لە ناوەندی ستۆکهۆڵم، کە بە بۆنەی هەفتەی پڕایدەوە بە ئاڵای حەوتڕەنگە و پەلکەزێڕینەیی نیشانەی جوڵانەوەی (HBTQ) و وێنە و پۆستەری ڕەنگاوڕەنگ ڕازێنراوەتەوە، چاوم کەوت بە چنوور فتووحی تا سەبارەت بە بەشداری رێکخراوەکەیان قسە بکەین.
هەفتەی پرایدی ستۆکهۆڵم(Stockholm Pride Veckan) لە لایەن ڕێکخراوی پرایدی ستۆکهۆڵمەوە (Föreningen Stockholm Pride) کە ڕێکخراوێکی داکۆکیکارە لە مافی ڕەگەزە جیاوازەکان(HBTQ-هۆمۆسێکسوێل، بیسێکسوێل، ترانسسێکسوێل و کوێر)، هەوڵ دەدات بۆ یەکسانی و دابینکردنی مافی هەموو تاکەکانی کۆمەڵگە، تا هەموان هەست بە ئارامی بکەن و لە بەرامبەر ئەو بژاردەیەی خۆیان هەڵیدەبژێرن ڕووبەڕووی هەڵاواردەیی و جیاکاری نەبنەوە.
بەرپرەسەکەی یەکییەتی ژنان لە کۆتایی قسەکانیدا تیشکی خستە سەر ئەوەی ئەوان دەیانهەوێ بەم هەنگاوەیان سەرنجی ڕای گشتی کوردانی سوید و کوردانی وڵاتیش ڕاکێشن، سەبارەت بەم چینەی کۆمەڵگا کە پەراوێز خراون و ناتوانن ئازادانە حەز و ویستی خۆیان بێننە زمان.
لە کەرنەڤاڵەکەدا ڕێکخراوە جیاوازەکانی کۆمەڵگای مەدەنی، پارت و لایەنە جیاوزەکان و خەڵکی لە هەموو چین و تویژەکانی کۆمەڵگە بۆ دەربڕینی پشتیوانی خۆیان لە هاوڕەگەزخوازان بەشداری چالاکییەکانی هەفتەکە دەکەن.
جیهان کچێکی ترانس سێکسواڵی کوردە و یەک لە بەشداربووانی ئەمساڵی هەفتەی پرایدە. جیهان ئەم ساڵ بە دڵخۆشیەکی زیاترەوە بەشداری هەفتەی پراید دەکات. ئەو ماوەیەک لەمەو بەر و دوای چاوەڕوانییەکی زۆر، مۆڵەتی مانەوەی لە سوید پێ درا. لە شەقامێکی ستۆکهۆڵمی پایتەخت و لە ژێر تیشکی خۆری هاوینە، دیدارێکی بچوکمان کرد. جیهان باسی دڵخۆشیەکانی خۆی بۆ کردم.
شایانی باسە، یەکێکی تر لەو ڕێکخراوە کوردییانەی بەشداری هەفتەی پرایدی ستۆکهۆڵم دەکات، ڕێکخراوی (Kurdiska HBTQ vänner)ـە. ڕێکخراوەکە ئەمساڵ ساڵی هەشتەمە بەشداری کەرنەڤاڵەکە دەکەن.
گوێ لە ڕاپۆرتەکە بگرن
به‌روار: 02/08/2017
2104 جار خوێندراوه‌ته‌وه
|