|
ده‌ڵێن بۆ ئیقامه هاوسه‌رگیری كردوه !
هەژار تەها
مالمۆکورد
چیرۆكی هاوسه‌رگیری په‌نابه‌رێك و ژنێكی به‌ته‌مه‌ن بۆته جێگه‌ی سه‌رنجی میدیاكان
موحسین نۆرۆزی ، ناوی ئه‌و په‌نابه‌ره ته‌مه‌ن 31 ساڵه‌یه كه هاوسه‌رگیری له خانمێكی به ته‌مه‌نی به‌ڕه‌گه‌ز ئوسترالیدا ئه‌نجامداوه به‌لاَم وادیاره هاوسه‌رگیریه‌كه‌شی ڕێگه‌ی پێنادات كه بتوانێت له وولاَتی ئوسترالیا له‌گه‌ڵ ئه‌و خانمه‌دا به‌رده‌وامی به ژیانی هاوسه‌رگیریه‌كه‌یان بده‌ن.
موحسین ، كه ساڵی پار هاوسه‌رگیری له‌گه‌ڵ ئه‌و خانمه ئوسترالیه‌دا كردووه ، ماوه‌ی چوار ساڵ له یه‌كێك له كه‌مپه‌كانی ده‌ره‌وه‌ی ئوسترالیادا ده‌ستبه‌سه‌ربووه وبه‌پێی یاسا تونده‌كانی ئوسترالیا ئه‌و كه‌سانه‌ی كه‌له‌و كه‌مپانه‌دا بوون ، كه پێشتر ویستویانه به‌قاچاخ و به‌به‌له‌م خۆیان بگه‌یه‌ننه ئوسترالیا ، هه‌رگیز مافی په‌نابه‌رێتی له‌ئوسترالیا وه‌رناگرن و ناتوانن داوای نیشته‌جێبوون له‌و وولاَته بكه‌ن. هه‌رچه‌نده پێده‌چێـت جیاوازی ته‌مه‌نی نێوان موحسین و هاوژینه‌كه‌ی زۆر بێت ، به‌لاَم ئه‌وان ئه‌وه ڕه‌تده‌كه‌نه‌وه كه هاوسه‌رگیریه‌كه‌یان به‌مه‌به‌ستی گواستنه‌وه‌ی ئه‌و په‌نابه‌ره بێت بۆ ناو ئوسترالیا چونكه به ووته‌ی ئه‌و خانمه ئه‌وان زۆر ده‌مێكه یه‌كتری ده‌ناسن و ده‌یانه‌وێت له‌ژێر سایه‌ی یه‌ك ماڵدا پێكه‌وه بژین.
ئه‌و خانمه ئوسترالیه چه‌ند وێنه‌یه‌كی خۆی و موحسینی له تۆڕی كۆمه‌لاَیه‌تی فه‌یسبووك بلاَوكردۆته‌وه به‌لاَم ئه‌وه‌ی جێگه‌ی سه‌ره‌نجه ئه‌وه‌یه كه ئه‌وخانمه ته‌مه‌نی خۆی بۆ میدیاكان ئاشكرانه‌كردووه و موحسینیش هیچ ئاماژه‌یه‌كی بۆ شوناسی نه‌ته‌وه‌یی خۆی نه‌كردوه.
سه‌رچاوه : ماڵپه‌ری ئاژانسی هه‌واڵی ناینی نیوز
به‌روار: 30/03/2017
2875 جار خوێندراوه‌ته‌وه
|