|
چین دەڵێ : ئه‌مریكا ده‌ستكه‌وت و كاتێكی به‌نرخی جه‌نگ له‌دژی كۆرۆنا به‌فیڕۆده‌دات
خه‌ندان-
وه‌زاره‌تی ده‌ره‌وه‌ی چین رایگه‌یاند، ویلایه‌ته یه‌كگرتوه‌كانی ئه‌مریكا له روبه‌ڕوبونه‌وه‌ی كۆرۆنادا كاتێكی به‌نرخ و ده‌ستكه‌وته‌كانی چین دژ به‌و ڤایرۆسه له شاری وهان به‌فیڕۆده‌دات.
چینگ شوانگ، وته‌بژی وه‌زاره‌تی ده‌ره‌وه‌ی چین ئه‌مڕۆ دوشه‌ممه له كۆنگره‌یه‌كی رۆژنامه‌وانیدا رایگه‌یاند "واشنتن هه‌وڵیداوه ناوبانگی ژماره‌یه‌ك لایه‌ن خراپ بكات و بگه‌ڕێت بۆ قوربانییه‌كانی ئه‌م دۆخه تا ئاراسته‌ی به‌رپرسیارییه‌تییه‌كانی خۆی بگۆڕێت".
ئاماژه‌ی به‌وه‌شكرد، پێویسته له‌سه‌ر ویلایه‌ته یه‌كگرتوه‌كانی ئه‌مریكا، به‌سیاسیی كردنی بڵاوبونه‌وه‌ی په‌تای كۆڤید-19 بوه‌ستێنێت و ناوبانگ و سه‌نگی چین و وڵاتانی دیكه خراپ نه‌كات".
ئه‌وه‌ش له‌كاتێكدایه، وه‌زاره‌تی ته‌ندروستی چین ده‌ڵێت "شاری وهان-ی ناوه‌ندی سه‌رهه‌ڵدانی په‌تاكه، تا ئێستا بۆ ماوه‌ی پێنج رۆژه له‌سه‌ریه‌ك هیچ حاڵه‌تێكی توشبونی به كۆرۆنا تێدا تۆمارنه‌كراوه و له سه‌رتاسه‌ری وڵاتیش ته‌شه‌نه‌سه‌ندنی ڤایرۆسه‌كه له‌ژێر كۆنترۆڵی كه‌رتی ته‌ندروستیدایه".
له هه‌مانكاتدا، چین هه‌مو هه‌وڵێكی خۆی خستوه‌ته‌گه‌ڕ، به‌مه‌به‌ستی رێگریكردن له گه‌ڕانه‌وه‌ی ڤایرۆسه‌كه له‌رێگه‌ی ئه‌و هاوڵاتی و سه‌ردانیكه‌رانه‌ی له ده‌ره‌وه‌ی وڵاته‌وه ده‌چنه چین.
پێشتر دۆناڵد تره‌مپ، سه‌رۆكی ویلایه‌ته یه‌كگرتوه‌كانی ئه‌مریكا رایگه‌یاند "كه‌مێك بێزار و نیگه‌رانه له هه‌ڵوێستی چین تایبه‌ت به بڵاوبونه‌وه‌ی ڤایرۆسی كۆرۆنای نوێ" و په‌كینی به‌وه تۆمه‌تباركرد، كه زانیاری نوێ و گرنگی تایبه‌ت به ڤایرۆسه‌كه ناداته وڵاتانی دیكه.
پێچه‌وانه‌ی ئاماره‌كانی چین تایبه‌ت به كۆرۆنا، تا ئێستا له سه‌رتاسه‌ری ویلایه‌ته یه‌كگرتوه‌كانی ئه‌مریكا 41هه‌زار و 708حاڵه‌تی توشبون به كۆرۆنا تۆماركراوه، 573 توشبوی ئه‌و وڵاته‌ش گیانیانله‌ده‌ستداوه و هیچ حاڵه‌تێكی چاكبونه‌وه‌ش له‌و وڵاته نییه
به‌روار: 24/03/2020
309 جار خوێندراوه‌ته‌وه
|