|
وەڵامی خەنێ بۆ مێردە کەرەنتێنکراوەکەی
هەفتەی ڕابوردو پەیامی مێردی خەجێم پۆست کرد، کە لە گەڕانەوەیدا لەسنوور بەهۆی ڤایرۆسی کۆرۆناوه کەرەنتین کرابوو ، فەرموون لەگەڵ وەڵامی خەجێ.
هەواڵت گەیی دوا هەواڵت بێ
ئەو کەرەنتینە کۆتا ماڵت بێ
هەر کڕوزایتۆ ، هەر وتت نیمە
ئیفلاسم لەسەر ساجی عەلیمە
تۆ چوی بۆ ئێران بۆ عیلاجی دڵ
یان بۆ کوڕێنی ، مەنزڵ وە مەنزڵ
زووانم سوا وە دوعاکردن
نەمزانی ئەچی بۆ ژن هاوردن
ئەی بۆ لەلای من واقە واقت بوو
شەوان پشت ئێشە و ئینزیلاقت بوو
گەڕاوی لەشوێن سمت و سینەی خڕ
بۆ لێرە نەت بوو ، سەر بنێیتە قوڕ
یان ئەوەی ئێرە گوێ ئاگردان بوو
قیمەتی نەبوو ، سوک و هەرزان بوو
ئاخر من نەمکرد فێڵ و فڕ بکەم
لە سوخمەی تەنگا سینە خڕ بکەم
با مژدەت پێ بەم ئیخباری مەزبووت
لەکەرەنتینۆ ئەخرێیتە تابووت
کەسێ شەکرەی وێ و سەرو حەفتاوێ
زەختی وێ دوو جار جەڵتە لێی داوێ
هەزار دختۆری لەسەر وێساوێ
تەوێ بیکوژێ وە گشت حساوێ
خۆلاسەی کەلام ، ئیزرایل لاتە
تەنها چاوڕێی دەقە و سەعاتە
کەوتە پرتە پرت فتیلەی عەمرت
هاکا وە لەقە هاتمە سەر قەبرت
جل سپی لەبەر چوار دەمامک دار
ئەوپێچنەوە وەک فەرش و کومبار
حەففارە ئەوبا بۆ جێیەکی دوور
شۆڕکردن بۆ چاڵ وەحەبلی ئەستوور
نە مەلا و سورەت یاسینت هەیە
نەکفن و دفن و تەلقینت هەیە
نوێژی سەر مردوو ، پرسە و کۆڕی چی
بەردی ئەلحەد و کێل و گۆڕی چی
خوای کرد حوکمیشت وە سوتانن بێ
نەوت و چەرخەکەت بالەسەر من بێ
گوێی شەیتان کەڕ وێ بەمەش نەمردی
ڤایرۆس زەفەری گەر پێ نەبردی
سەرت لێ شێواو هاتی بۆ لای من
وەچەقۆیە کول بۆت ئەبڕم لەبن
بیکە وەدیاری خانمی تازە
پیرۆزی ئەوبێت ئەو نێرکە پیازە
لەکوێوە هاتووی بڕۆرۆ ئەوێ
با خانم جونت وەفریات کەوێ
کەوتویته حەقلێ ئەڵغامی ناوە
کۆرۆناش بڕوا ، شەڕ خەجێ ماوە
پشکۆ ڕەحیم
به‌روار: 22/03/2020
452 جار خوێندراوه‌ته‌وه
|