|
ناو و وێنەی سیان لەو کوردانەی لە هێرشەکانی ئەڵمانیادا کوژران
شەوی ڕابردوو، لە دوو رووداوى تەقەکردندا لە نزیک شارى فرانکفۆرت، ١١ کەس کوژران، چوار لە کوژراوەکان کوردی باکوری کوردستان بوون و و ئێن ئاڕ تیش ناو و وێنەی سیانیان ئاشکرادەکات.
هەڵگورد عومەر پەیامنێری ئێن ئاڕ تی لە ئەڵمانیا رایگەیاند، چوار لەو کەسانەی لە هێرشەکانی شەوی رابردوودا کوژراون کوردی باکوری کوردستان بە ناوەکانی بیلال گۆكچە، گۆكھان گولتەكین، فەرھاد ئونڤار. دەشڵێت، تائێستا ناوی ئەوەی دیکەیان ئاشکرانەکراوە
دوای رووداوەکە پۆلیسى ئەڵمانیا رایگەیاند، رووداوى تەقەکردنى یەکەم لە نێو گازینۆیەک بووە لە ناوەڕاستى شارۆچکەى هاناو لە نزیک شارى فرانکفۆرت، بەهۆیەوە سێ کەس کوژراون، پێنح کەسى دیکە برینداربوون.
ئاماژەى بەوەشکردووە، رووداوى دووەمیش لە گازینۆیەکى گەڕەکێکى دیکەى هەمان شارۆچکە بووە و بەهۆیەوە پێنج کەس کوژراون و چەند کەسێکیش برینداربوون.
میدیاکانى ئەڵمانیش بڵاویانکردەوە، سەرلەبەیانی ئەمڕۆ سێ کەس لە بریندارەکان گیانیان لەدەستداوە و ناسنامەى تەقەکەرەکەشیان ئاشکراکردووە کە ناوى تۆبیاسە و کەسێکى راستڕەوى توندڕەوبووە.
بەپێى لێدوانى پۆلیسى ئەڵمانیا، دواتر تەرمی تۆمەتبارەکە لەگەڵ تەرمی کەسێکی دیکەدا لە ماڵی تۆمەتبارەکەدا دۆزراونەتەوە، لێکۆڵینەوەش لە رووداوەکان دەستیپێکردووە بەڵام تا ئێستا هۆکارى رووداوەکان نەزانراوە.
هاوکات، کلاودیا رۆس، جێگری سەرۆکی پەڕلەمانی ئەڵمانیا بە ئێن ئاڕ تی ڕاگەیاند، "بیرمان لای ئەو خێزانە کوردانەیە کە کەسوکاریان لە رووداوەکەدا گیانیان لەدەستداوە".
شەوی رابردوو، لە هێرشدا لە شارۆچکەى هاناوی سەر بە شارى فرانکفۆرت لە رۆژئاواى ئەڵمانیا، ١١ کەس کوژران.
ئێن ئاڕتی
به‌روار: 21/02/2020
651 جار خوێندراوه‌ته‌وه
|