|
ئەمریکا سیستەمی دژەموشەكی پاتریۆت لە عێراقدا جێگیر دەکات
خەندان-
بەرپرسانی وەزارەتی بەرگری ئەمریکا (پنتاگۆن) رایدەگەیەنن، وڵاتەکەیان لە ئێستادا بڵاوەپێکردنی سیستەمی دژەموشەكی پاتریۆت بۆ بەرپەرچدانەوەی هەڕەشەکانی ئێران بۆ سەر بنکە سەربازییەکانی واشنتن لە عێراقدا تاوتوێ دەکات.
لە ئێستادا پنتاگۆن تاوتوێی بڵاوەپێکردنی سیستەمی دژەمووشەكی پاتریۆت لە عێراقدا دەکات
لەو بارەیەوە بەرپرسێکی وەزارەتی بەرگری ئەمریکا بە کەناڵی فۆکس نیوزی راگەیاندوە، "دوای هێرشەکانی ماوەی رابردوی ئێران بۆ سەر بنکەکانی ئەمریکا لە عێراق کە بوە هۆی برینداربونی ژمارەیەک سەربازی ئەمریکی، لە ئێستادا پنتاگۆن تاوتوێی بڵاوەپێکردنی سیستەمی دژەموشەكی پاتریۆت لە عێراقدا دەکات".
5ی ئەم مانگە پەرلەمانی عێراق بڕیار چونەدەرەوەی هێزە بیانییەکانی پەسەندکرد
بەهێزکردنی پێگەکانی ئەمریکا لە عێراق لە کاتێکدایە، رۆژی 5ی ئەم مانگە پەرلەمانی عێراق بەبێ ئامادەبونی کورد و سونەکان، بە بەشداری سەرجەم فراکسیۆنە شیعییەکان بڕیار چونەدەرەوەی هێزە بیانییەکانی پەسەندکرد، ئەوەش دوا دو رۆژ هات لە کوژرانی هەر یەک لە قاسم سولەیمانی فەرماندەی فەیلەقی قودسی ئێران و ئەبو مەهدی موهەندیس جێگری سەرۆکی دەستەی حەشدی شەعبی لە بۆردومانێکی ئەمریکییەکاندا لە بەغدا.
دوای بڕیارەکەی پەرلەمانی عێراقیش دۆناڵد ترەمپ سەرۆکی ویلایەتە یەکگرتوەکانی ئەمریکا هەڕەشە سەپاندنی سزای بەسەر بەغدادا کرد ئەگەر حکومەتی عێراق بڕیاری چوندەرەوەی هێز بیانییەکان پەسەند بکات.
به‌روار: 23/01/2020
370 جار خوێندراوه‌ته‌وه
|