پەیامی عەبدوڵا پەشێو بۆ ڕۆژئاوای کوردستان
دەربارەى رۆژئاواى کوردستان+ -
دو ساڵ لەمەوبەر و لەکاتى هێرشى عەفرین هەندێک بیر و راى خۆم دەربڕى دەربارەى رۆژئاوا، ئێستا رەنگە هەندێک شت دوبارە ببنەوە و بە خراپى نازانمە دوبارە ببنەوە، ئەردۆغان وەک هەمو دیکتاتۆرە خوێنڕێژەکانى مێژو، وەک جەنگیز و هۆلاکۆ و هیتلەر و سەدام چاوى بە غەیرى کەلاوە و خوێن هەڵنایەت، بە تایبەتى کەلاوەى کوردستان و خوێنى کورد. ئەردۆغان لە هیچ ناپڵینگێتەوە، سڵ ناکاتەوە، جا لە چى بپڵینگێتەوە! هیچ کاتێک وەک ئێستا پاشەڵى دنیاى دیموکراسى و مافى مرۆڤ و شارستانى روت نەبوە بە تایبەتى هى ئەوانەى لافى زلهێزى لێدەدەن کە لە راستیدا لە چەک فرۆشى گەورە بەولاوە هیچى دى نین.

من باسى دەوڵەتان دەکەم نەک گەلانى دنیا، باسى رۆبۆتى پارە ژمێر دەکەم نەک خوێن و دەمار و ئێسقان و ویژدان
من باسى دەوڵەتان دەکەم نەک گەلانى دنیا، باسى رۆبۆتى پارە ژمێر دەکەم نەک خوێن و دەمار و ئێسقان و ویژدان، ئەردۆغان زات ناکات یەک هەنگاو بنێت ئەگەر ئەمەریکا و روسیا و وڵاتانى دیکە چراى سەوزیان بۆى هەڵنەکردبێت، روسیا و ئەمەریکا و هەمو دنیا ئاگادارى خاڵى بێهێزى ئەردۆغانن کە کورد و کوردستانە، ئەوەى لە سیاسەتیش نەزانێت بە ئاسانى دەتوانێت بە بەکارهێنانى مەسەلەى کورد ئەردۆغان دادۆشێت. لەبیرتانە دواى خستنەخوارەوەى فڕۆکەیەکى روسیا رۆژانە کەناڵە روسییەکان بەرنامەیان چێ دەکرد لەسەر کورد و پەلامارى تورکیایان دەدا ژیرنوفسکى کە ترەمپى روسیایە گەفى لە تورکیا دەکرد و دەیوت "بەس چەک بدەینە کورد، کورد دەوڵەتێکى دۆستى روسیا دادەمەزرێنێت، تورکیا ئادارى لەسەر پادار نامێنێت"، بەمە ئەردۆغانیان هێنایە سەر چۆک هەرچیان ویست وەریانگرت.

دەرگاى بەرزەخ کرایەوە بێ زەوەرترین سەودا و مامرەت گۆڕینەوەى سوننە بو بە عەفرین، ئەردۆغان هەمو شار و گوندە سونییە هاودین و هاو مەزهەبەکانى خۆى رادەستى شام و مۆسکۆ کرد بەرامبەر بە عەفرین، هەمویانى لە ئیدلیب مۆڵدا دواى ئەوەش بە سەودا و مامرەتێکى تازە بەرامبەر بە دورخستنەوەى بەچکە شێرانى رۆژئاوا لە سنورى دەسەڵاتى دەستکردى خۆى، ئیدلیبیشى خستە بەر هێرشى رۆژانەى مۆسکۆ و شام، ئەردۆغان لە میدیاکاندا دەستى بە شەڕێکى دژوارى سایکۆلۆژى کردوە دژى گەلى کوردستان.

 

ئەم شەڕە، شەڕى دو ئایدۆلۆژى یان دو بەرژەوەندى ئابورى نییە شەڕى پاکتاوى رەگەزییە
ئەردۆغان هەمو تورکیاى بە مزگەوتەکانیشەوە لە شەڕى گەلى کوردستان ئاڵاندوە، ئەم شەڕەش شەڕى دو ئایدۆلۆژى یان دو بەرژەوەندى ئابورى نییە شەڕى پاکتاوى رەگەزییە، گەلى کودستان بە تێکڕایی دەبێت بەشدارى ئەم شەڕە سایکۆلۆژییە بێت کە هاتوەتە ناو ماڵەکەى و بە شەڕێکى دژوارتر بەرپەرچى بداتەوە، گەلى کوردستان بێ هێز نییە وەک ئەوەى دێتە بەرچاو راستە ئێستا دەوڵەتى نییە، بەڵام ئەگەر ستراتیژێکى نەتەوەیی و سێنتەرێکى پاک و خوێندەوارى بڕیار بەدەستى هەبێت دەتوانێت کار بکاتە سەر سیاسەتى بەلاى کەمەوە چوار وڵاتى ناوچەیەکى گرنگى جیهان کە رۆژهەڵاتى ناوەڕاستە. لە رێگەى ئەو چوار وڵاتەشەوە کار بکاتە سەر سیاسەتى جیهان، قەدەرى نەتەوەى کورد ژیانە، دینامۆى ژیان لە خودى ئینسانى کورد دایە گەلى کوردستان گەورەتر و بەهێزترە لەوەى هیچ هێزێک بتوانێت هەرسى بکات یان با بڵێین هەڵیتاوێنێت، ئاخر گەلى کوردستان وەک گەل نەک دەڤەر و تیرە و هۆز و بەرەباب (2500) ساڵ پترە لەسەر خاکى خۆى سەردەست و فەرمانڕەوا نییە کەچى لەناو نەچوە، سەدان گەل و هەزاران زمان لەناوچون، کورد هەر مایەوە و زمانە شیرینەکەشى دواى (2500) ساڵى لەدەستدانى دەسەڵات هەر زیندوە ئەگەر چى نە زمانى دینێکى گشتگیر نە زمانى فەرمى سوڵتانە نەزمانى دەوڵەتێک بوە بەخێوى بکات و بیڕسکێنێت و لێى خەرج بکات.

 

سەدان گەل و هەزاران زمان لەناوچون، کورد هەر مایەوە و زمانە شیرینەکەشى دواى (2500) ساڵ و لەدەستدانى دەسەڵات، هەر زیندوە 
زمانى کوردى یەکێکە لە پەڕجۆیەکانى سروشت زۆر سەرسوڕهێن تر لە لە پێرامیدەکان و باخچە هەڵواسراوەکانى بابل، ئەوەتا دەسەڵاتى بەرەبابەکانى خۆمان بەرەبابەکانى باشور (30) ساڵە کەوتونەتە گیانى ئەو پەڕجۆیەى خوا سەدان کەناڵ و رادیۆ و گۆڤار و رۆژنامە و بەرنامەى سەقەتى بەناو پەروەردەیان تێى بەرداوە، کەچى زمانى کوردى ئەو دیاردە بێ هاوتایەى سروشت بەردەوام هەر خۆى برینەکانى خۆى ساڕێژ دەکات هەر لە سەر پێیە و خۆى نادات بەدەستەوە، ئێمە هەرمانى خۆمان و نەمرى خۆمان لە سروشتى کوردستان وەردەگرین و لێرە دەمانبڕنەوە لەولا سەرهەڵدەدەینەوە، لەولا سەرمان دەگرن لێرە بە گوڕتر هەڵدەقوڵێین وەک کانیى وزەیەکى ئەبەدى لە مرۆڤى کورددا هەیە لە سروشتى کوردستان هەیە هیچ هێزێک نایتوێنێتەوە، کات کەمە و قسە زۆرە، بۆیە چەند سەر قەڵەمێک دەهاروژێنم، شیکردنەوە و لێکدانەوەکان بۆ ئێوەى خۆشەویست جێدەهێڵم، دەگەڕێمەوە بۆ رۆژئاوا.

هەندێک تێبینى هەن نامەوێت لە قاڵبى رەخنە دەریان ببڕم، بەڵکو وەک تێبینى جارێ، لە کاتى شەڕ رەخنە بە باش نازانم دەڵێم پارتە کاریگەرەکانى باکور دیسان ئەوەیان کرد کە لە کاتى شەڕى عەفرین کردیان، من درەنگ لەسەر ئەو بابەتە هاتمە گۆ، چونکە لە کاتى شەڕدا لە رۆژانێکدا بە هەمو چەکێکى ناتۆ لە رۆژئاواى جەستەمان دەدرێت نابێت سەرقاڵى دەو و دەوانێ و رەخنە و رەخنەکارى بین، دەبێت وەک هەمو گەلانى دنیا وەک جولەکە وەک ئەرمەنییەکان وەک ئەوانى تر لەکاتى وادا وەک تورک بە هەمو هێزێکمانەوە هەرکەسە و بە گوێرەى تواناى خۆى بچێت سەنگەرى بەرگرى کردن لە دەمار بە دەمار و پارچە بە پارچەى گیانى جەستەى خۆى، ئێستا دەشێت هەندێک هزر و بیر هەبن بەگۆ بێت باشترە لەوەى خەفە بکرێت یان پەردە پۆش بکرێت بە تایبەتیش کە رەخنەکتان نیازێکى باشیان لەپشتەوە بێت و پڕا و پڕ بن لە خۆشەویستى نیشتیمان و نەتەوە.

 

کورد تا ئەو جێیەى دەتوانێت وەکو هەمو دنیا دەببێت شەڕ لە وڵاتى خۆى دوربخاتەوە
ئاخر نابێت حیزبێک توانایەکى بێ سنورى بەشەریى و مادى و میدیایی هەبێت کەچى هەر لەسەر خاکى خۆى بە دەمى خۆى سروشتى نیشتیمانى بداتە بەر ئاگر و ئاسن، کورد تا ئەو جێیەى دەتوانێت نابێت هەر لە وڵاتى خۆى شەڕى داگیرکەرانى بکات شار و گوندى خۆى بە وێرانکردن و خوێنى گەلى خۆى بە رژاندن بدات، ئەویش دەبێت تا ئەو جێیەى دەتوانێت وەکو هەمو دنیا شەڕ لە وڵاتى خۆى دوربخاتەوە و لە ماڵی داگیرکەر بە قوربانییەکى زۆر کەمتر توانایەکى زۆر بچوکتر دەستى خۆى بوەشێنێت بیشڵەژێنێت دەمارى ئابورى ببڕێت. داگیرکەر سەدان فڕۆکەى پێشکەوتوى جەنگیى و هەزاران تانک و زرێپۆش و سەدان هەزار جەندرمە و چەتەى بەکرێگیراو و قۆڵاییەکى ئابورى و مرۆیی بێسنورى هەیە و دەتوانێت ئەمانە هەمویان لە شەڕێکى روبەروى بەرەییدا بەکاربێنن، بەڵام ناتوانێت بەرامبەر بە دە پازدە فیداکارى ناو ماڵى خۆى ئەمانە بەکار بێنێت کە دوژمنى هۆڤى و بێڕەوشت و هار ماڵى لە شوشە بێت هەرچە چەک و تەکنەلۆژیاى گرانبەها هەیە بە ( (S400 شەوە بەرامبەر بە چەند بەردهاوێژێک دەستەوەستان دەبێت و لاڵ و پاڵ دەکەوێت.

گومانم لەو ئارامییەى وڵاتى داگیرکەر هەیە، کوردستانێک ئەو هەمو کچ و کوڕە فیداکارە بێ وێنەیەى تێدا بێت کە نمونەى خۆڕاگرییان لەسەرتاسەرى دنیا لە مێژودا نییە چوار بەردهاوێژى تێدا نییە دەست لە ماڵە شوشە بەندەکانى داگیرکەر بوەشێنێت، تۆ ناتوانیت لەگەڵ ئەخلاقسزێک لە شەڕدا بیت دەست نوێژت هەڵگرتبێت و بەرماڵیشت لەسەر شان بێت، دەسەڵاتى بەرەبابەکانى باشور باسى راگرتنى شەڕ و دیالۆگ دەکەن، گفتوگۆى کێ لەگەڵ کێ؟، وڵاتێک بە هەمو هێزییەوە خەڵکێکى سیڤیلى داوەتە بەر زەبرى تانک و تۆپ و فڕۆکە و دەیان هەزار جەندرمە و چەتەى لە شار و گوندى تۆ بەرداوە  لە خوشک و دایک و باب و براى تۆ بەرداوە. ئەوەى هەیە شەڕ نییە، شەڕ پێفرۆشتنى لایەکى هار و ملهوڕە بە تۆ و بە کەس و کارى تۆ بە زارۆیانى تۆ قسەى دەسەڵاتى بەرەبابەکان لە قسەى بێ لایەنێکى وادەچێت کە نەیەوێت گومرگى قسەکانى بدات تەنانەت هەندێکیان خۆیان بە ناوەندگیر نیشان دەدەن.

ئاخر ئەردۆغان گوێ لە ئامۆژگارى ئەمەریکا و چین و ئەوروپا ناگرێت گوێ لە تۆیەکى بندەستى خۆى دەگرێت ماڵ وێران! کەناڵى تیڤى هەیە رۆژى سەد جار وشەى ئۆپۆزسیۆن و ئەنجومەنى نیشتیمانى و لەشکرى ئازاد بۆ چەتە داعشەکانى ئەردۆغان بەکار دێنێت ئاخر وشەى ئۆپۆزسیۆن لە هەمو رۆژهەڵاتى ناوەڕاستدا بە ئەرێنى دێتە بەرگوێ، تۆ بەمە ئاگادار بیت یان ئاگادار نەبیت هاوکارى دوژمن دەکەیت بەشداریى دەکەیت لە شەڕى سایکۆلۆژى دژى نەتەوە و نیشتیمانەکەى خۆت، لە باشورى وڵات دەبوایە لە هەمو کون و قوژبنێکى کوردستان خۆپیشاندانى سەدان هەزارى بکرێت بەتایبەتى لەبەردەم (UN) و کونسوڵخانەى زلهێزان.

دەبوایە کونسوڵى تورکان هەر لە رۆژى یەکەمەوە بە فیک و هوڕ لە کوردستان وەدەر بنرێ، بێگومان دەزانم چى بەسەر کوردستان هاتوە چۆن کشتوکاڵ و پیشەسازى خۆماڵى قەڵاچۆ کراوە، ئاگام لێیە دەزانم چۆن هەتیوچەکانى ئەردۆغان ئەو کوردستانەیان کردوەتە گوفەکى بەرماوەى تورکیا لەگەڵ ئەوەشدا هەتا بکرێت چى لەسەر ئاستى تاک چى لەسەر ئاستى کۆمەڵ تا تورکیا ئەم تورکیایەى ئەردۆغانەکان بێت مان بگرن لە بەکارهێنانى خۆراک و کاڵاى تورکى نان تورکى بو مەیخۆن، ئاو تورکى بو مەیخۆنەوە و پێڵاو تورکى بو لەپێى مەکەن، جلک تورکى بو لەبەرى مەکەن هەتا دەتوانن بۆ گەشتوگوزار سەفەرى وڵاتى ئەردۆغان مەکەن ئەو کەناڵانە تف باران بکەن کە گەلى کوردستان بە دراماى تورکى دەتورکێنن و ژیانى جڤاکیمان وێران دەکەن.

ئەو قوتابخانانە دابخەن کە منداڵى کورد دەتورکێنن شەڕ و قونەشەڕێکە، خۆتان لە کەس بە کەمتر مەزانن کەى تورکێک منداڵى خۆى لە قوتابخانەیەکى کوردى خستە بەر خوێندن ئێوەش ئەمە بکەن ،فشار بێننە بەر بەرەبابەکان کە ناوەڕۆکى ئەو بە ناو رێککەوتنەى پەیوەستە بە نەوت ئاشکرا بکەن کە لەگەڵ کۆمپانیا تورکییەکان و ماڵباتى ئەردۆغان واژۆیان کردوە، هەرچى پارەى لە بانقەکانى تورکیا هەیە دەبێت بکێشرێتەوە ئەردۆغان بە پارە و نەوتى کوردستان بوە بەم سوڵتانەى ئەمڕۆ، دەبێت بپرسین ئێمە نەوت دەفرۆشینە ئەردۆغان یان ماڵباتەکەى ئەردۆغان یا دەکڕین؟ چەند نەوت زێتر دەچێتە تورکیا قەرزى سەرمان هەڵدەکشێ، پێویستە قەبارەى راستەقینەى خۆمان نیشانى ئەردۆغان و هەمو دنیا بدەین کە ئێمە نەتەوەیەکى گەورەى رۆژهەڵاتین هەزاران ساڵ پێش هاتنى ئەژدادى ئەردۆغان و مەنگۆلیا و چین و ماچینەوە ئێمە خاوەنى ئەم خاکە بوین  لەوە گەورەترین گەدەى بۆگەنى ئەردۆغان هەڵمان تاوێنێت.

 

ئێمە چۆن زمانێکین خوێنمان یەکە هەرواش چارەنوسمان یەکە
بە دنیان نیشان بدەن کە بەهاى خوێنى کورد کەمتر نییە لەهى هیچ نەتەوەیەکى دیکە پیرۆزى خاکەکەى کەمتر نییە لە هیچ خاکێک کە هەمو رۆژ بە تۆپ و تەیارە لێى بدرێت، ئێمە زێدمان هەرکوێ بێت سلێمانى، هەولێر، دهۆک، کەرکوک، خەنەقین، شنگال، مهاباد، قامیشلو، کۆبانێ، دیاربەکر، نابێت رێگە بدەین وەتاکمان بخەن یەک یەک قڕمان بکەن.

ئێمە چۆن زمانێکین خوێنمان یەکە هەرواش چارەنوسمان یەکە، ئەگەر تا ئەمڕۆ مێژومان پڕ تێکشکان بوە هەر لە سۆنگەى پەرتبونمان بوە نەک بێ هێزى دابڕ دابڕیان کردوین تاک تاک خوێنیان لەبەر داچۆڕاندوین و ئێمەیان کردوە بە هەولیرى و سلێمانى، دهۆکى و زاخۆیی، مهابادى و سنەیی، ئێمەیان کردوە بە زەنگەنە و بارزانى و فەیلى و تاڵەبانى و گەردى و سورچى و جاف و هەرکى و نازانم چى و چى، ئێمەیان کردوە بە سۆرانى و کرمانج و هەورامى و زازاکى، ئەوەیان لەبیر بردوینەتەوە شتە سەرەکییەکەیان لەبیر بردوینەتەوە کە ئێمە بمانەوێ و نەماونەوێ هەزار جاریش خۆمان داماڵین لە کورد بون هەر کوردین و کوردستانیشین.

با ئەگەر کرا هەمومان بە کردەوە ئەگەر نەشمانتوانى با بە زمان و دڵ لەگەڵ هاو خوێنانى خۆمان بین
ئەنجامى ئەم شەڕە هەرچى بێت لە مەوداى دوردا بردنەوەمان مسۆگەرە هەمو دنیا دەبینێت کورد لە ماڵى خۆیەتى و پەلامارى کەسى نەداوە تورکیاى ئەردۆغانیش ناموسى چوە بوە بە گاڵتەجاڕى هەمو دنیا، کچ و کوڕانى رۆژئاوا لەو چەند ساڵەدا چ لە دیسپلینى شەڕ و سەربازیدا چ لە بەڕێوەبردندا توانیان جوانترین سیماى گەلى کوردستان نیشانى دنیا بدەن سەرمان بڵند بکەن.

با هەمومان ئەگەر کرا بە کردەوە ئەگەر نەشمان توانى بە کردەوە با بە زمان و دڵ لەگەڵ هاو خوێنانى خۆمان بین، بێگومان رەخنە و تێبینیم گەلێک زۆرن، بەڵام لە کاتى شەڕدا هەر ئەوەندە دەڵێم رۆژئاوا لە دڵمدایە بە رۆح و بە گیان لەگەڵیانم هیوادارم ئێوەش لەگەڵیان بن و لەگەڵیان بمێننەوە.
سبەی
به‌روار:  04/11/2019
222   جار خوێندراوه‌ته‌وه
  بابه‌تی زیاتر ...
ئەنجومەنی پیرانی ئەمریکا پڕۆژە یاسای کۆمەڵکوژی ئەرمەنەکانی پەسەندکرد کە لەلایەن دەوڵەتی عوسمانییەوە ئەنجامدرابوو. سیناتۆر رۆب مێندێز، لە تویتەر رایگەیاند، ئەنجومەنی پیرانی ئەمری درێژه‌ ...
لە دووەمین ڕۆژی کۆنفرانسی ڕۆژئاوا کە لە پەرلەمانی ئەوروپا بەڕێوەچوو، بەدران چیا کورد ڕاوێژکاری خۆبەڕێوەبەری دیموکراتی باکورو ڕۆژهەڵاتی سوریا ڕایگەیاند: ئەردۆغان بە پارەی ئەوروپا کو درێژه‌ ...
شارپرێس: ئەنجوومەنی باڵای دادوەری عێراق رایدەگەیەنێت، لایەنی پەیوەندیدارمان ڕاسپاردووە فەرمانی گرتن بۆ هەموو ئەو کەسانە دەربکات لە کوشتنی مێردمنداڵەکەی گۆڕەپانی وەسبە بەشداربوو درێژه‌ ...
فەرماندەی ئەرکانی هێزە دەریاییەکانی سەر بە حەفتەر رایگەیاند، فەرمانیان پێیە بۆ تەقاندنەوەی هەر کەشتییەکی تورکیی سنورە ئاوییەکانی وڵاتەکەیان ببەزێنێت. لیوا فەرەج مەهدودی کە سەر ب درێژه‌ ...
رووداو - بەریتانیا سبەی لە بەریتانیا هەڵبژاردنی پێشوەختە دەکرێت و دەنگدان چارەنووسی برێکزیت یەکلایی دەکاتەوە. ململانێکە لەنێوان پارتی پارێزگاران و کرێکاراندایە. هەرکامیان بیبەنە درێژه‌ ...
(سبەی): پاشنیوەڕۆی ئەمڕۆ چوارشەممە (11/12/2019) پاش ئەوەی كچێك لە نەخۆشخانەی سیدەكان ددانی هەڵكێشا، دواتر گیانی لەدەستدا. مفەدەم شەماڵ دێواری حامید وتەبێژی پۆلیسی سۆران درێژه‌ ...
لێژنەی کاروباری دەرەوەی ئەنجومەنی پیرانی ئەمریکا، لەبارەی کڕینی سیستمی بەرگری ئاسمانی S400 لە لایەن تورکیاوە لە رووسیا، پرۆژەیاسای سزادانی تورکیا کە لەلایەن ئەندامانی کۆماریخواز و درێژه‌ ...
گەریلا تیڤی دیمەنی تێکشکاندنی بنکەیەکی سەربازی دەوڵەتی تورکی لە گردی پارتیزانی بڵاو کردەوە کە لەلایەن گەریلاکانی ‌‌هێزەکانی پاراستنی گەل-هەپەگە گورزی قورسیان لەو بنکەیە دابوو . درێژه‌ ...
شارپرێس: فەماندەی هێزەكانی سوریای دیموكرات رایدەگەیەنێت، ئەمەریکا و روسیا بەرپرسیارن لە گۆڕینی دیمۆگرافیای ناوچەکە. مەزڵوم کۆبانێ لەتویتێكدا لەهەژماری خۆی لە تۆڕی کۆمەڵایەتی درێژه‌ ...
(سبەی): لەكاتێكدا كورد لە رۆژئاوا بەردەوام لە روبەڕوبونەوەی ئەو هەڵمەتی جینۆسایدەیە كە بە ئاشكرا لەلایەن سوپای توركیا و چەكدارە جیهادییە بەكرێگیراوەكانیەوە جێبەجێ دەكرێت، رەجەب درێژه‌ ...
ژماره‌ی بابه‌ت
مافەکان پارێزراوە بۆ مالمۆکورد
میوانی سه‌رهێڵ:   131
کۆی سه‌ردان:   18554678