|
ژمارەیەک لە کچانی ئێزدی لە ئیمارات و سعودیە و ئوردن فرۆشراون
(سبەی):
بەرپرسی ماڵی ئێزدییەکان ئاشکرای دەکات، ژمارەیەک لە کچانی ئێزدی براونەتە ئیمارات و سعودیە و ئوردن و وەک سەبایا و کەنیزەم فرۆشراون.
ساڵح حسێن، بەرپرسی ماڵی ئێزدییەکان لە عێراق بە رۆژنامەی (القدس)ی وتوە: ژمارەیەک هاوڵاتیی ئیماراتی و سعودی و ئوردنی کچانی ئێزدیان وەک سەبایا لە چەکدارانی داعش لە سوریا کڕیوەو بردویانەتەوە بۆ وڵاتەکانی خۆیان، بۆیە پێویستە حکومەتی عێراق و وەزارەتی دەرەوە هەوڵی جددی بدەن بۆ دۆزینەوەی ئەو کچانە و گەڕاندنەوەیان بۆ ناو کەسوکاریان.
پێشتریش عەلی خانسۆری چالاکوانی ئێزدی ئەو زانیارییانەی پشتڕاست کردبوە و ئاشکرای کردبو؛ لە شاری دێرەزوری سوریای چەکدارانی داعش بازاڕێکی گەورەیان بۆ مامەڵەکردن بە کچان و ژنان و منداڵانی ئێزدییەوە دروست کردبو و لە رێگەی ژمارەیەکی دەڵاڵی سورییەوە ئەو کچانە بە هاوڵاتیانی سعودی و ئیماراتی فرۆشراون.
لە ساڵیادی داگیرکردنی شەنگال و کۆمەڵکوژیی ئێزدییەکاندا، نوسینگه‌ی رزگاركردنی رفێندراوانی ئێزدی ئاشکرای کرد؛ شەش هه‌زار و (417) هاوڵاتی ئێزدی رفێنراون و لەو ژمارەیەش سێ هه‌زار و (509) كه‌س ئازادکراون و و تائێستاش دو هه‌زار و (908) كه‌س تائێستا بێسەرو شوێنن.
به‌روار: 08/08/2019
899 جار خوێندراوه‌ته‌وه
|