|
کۆچەر بیرکار وەک یەکێک لە بیرمەندانی جیهان هەڵبژێردرا
(سبەی):
پرۆفیسۆر کۆچەر بیرکار، وەک یەکێک لە (50) بیرمەندی ساڵ لەسەر ئاستی جیهان هەڵبژێردرا.
گۆڤاری پرۆسپێكت-ی بریتانی، پێشبڕكێیەكی بۆ هەڵبژاردنی باشترین بیرمەندی ساڵ راگەیاندوە، كە ناوی (50) بیرمەندی تێدایە و یەكێك لە بیرمەندەكانیش پرۆفیسۆری كورد كۆچەر بیركارە.
ساڵانە ئەو پێشبڕكێیە ئەنجامدەدرێت و لە سەرانسەری جیهانەوە خەڵک دەتوانن لە سەر سایتی فەرمیی ئەو گۆڤارە دەنگ بدەن بەو بیرمەندەی كە لە ریزبەندی لیستە پێشكەشكراوەكەدا لایان پەسەندە.
کۆچەر بیرکار ناوی تەواوی فەرەیدون درەخشانییە، ساڵی (1978) لە گوندی نێ-ی سەر بە شاری مەریوان لە دایک بوە، لەوکاتەی خوێندکاری قۆناغی بەکالۆریۆس بوە وەک پەنابەر روی کردوەتە بەریتانیا و لەئێستادا یەکێکە لە پرۆفیسۆرەکانی زانکۆی کامبریجی بەریتانیا.
بیرکار، ساڵی رابردو لە بەرازیل خەڵاتی فێڵدزی جیهانیی وەرگرت کە بە نۆبڵی بیرکاری ناودەبرێت، لەکاتی وەرگرتنی خەڵاتەکەدا پرۆفیسۆر کۆچەر بیرکار رایگەیاند: هەگیز باوەڕم نەدەکرد ئەو خەونەم ببێتە راستی، چونکە لەوکاتەی خۆێندکاری بەکالۆریۆس بوم لە تاران وێنە و مەدالیای ئەو کەسانەم دەبینی کە خەڵاتی فێڵدزیان وەرگرتوە، بە خەیاڵمدا ناهات رۆژێک ئەو خەڵاتەش بەمن ببەخشرێت.
خەڵانی فێڵدز چوار ساڵ جارێک دەبەخشرێتە باشترین زانا و پرۆفیسۆری بواری بیرکاریی، لەگەڵ مەدالیاکەشدا بڕی (15) هەزار دۆلار دەدرێتە براوەی خەڵاتەکە.
مەدالیای فێڵدز، یەکێکە لە گرنگترین خەڵاتەکانی بواری بیرکاریی و هاوشانی خەڵاتی نۆبڵە، جۆن چارڵز فێڵدز زانا و پرۆفیسۆری بیرکاریی کەنەدیی، لە ساڵی (1936)ەوە خەڵاتەکەی داهێناوە و هەر چوار ساڵ جارێک و بەبەشداریی پرۆفیسۆر و شارەزایانی بوارەکە دەبەخشرێتە داهێنەرانی بواری زانستی بیرکاریی ئەوانەی تەمەنیان لە (40) ساڵ کەمترە.
رۆژی (27/3/2019)ەش لە مەراسیمێکدا کە لە هۆڵی سەعد عەبدوڵا لە هەولێر رێکخرابو، زانکۆی سەلاحەدین، دکتۆرای فەخری بەخشیە پرۆفیسۆر کۆچەر بیرکار، زانای ناوداری کورد لە بواری بیرکاری و براوەی خەڵاتی جیهانی فێڵدز.
به‌روار: 30/07/2019
765 جار خوێندراوه‌ته‌وه
|