|
نەتەوە یەکگرتووەکان: تاوانی جینۆساید دژی موسڵمانانی رۆهینگیا ئەنجامدراوە
شارپرێس:
نەتەوە یەكگرتووەكان رایگەیاند، هێزە چەكدارەكانی میانمار خراپـترین تاوانیان بەرامبەر موسڵمانە ڕۆهینگییەكان ئەنجامداوە، بۆیە دەبێت لێكۆڵینەوە لەگەڵ ژەنەڕاڵە باڵاكانی ئەو وڵاتە بكرێت و بە تاوانی جینۆساید دادگایی بكرێن.
نوسینگەی مافەكانی مرۆڤی سەر بە نەتەوە یەكگرتووەكان ئەمڕۆ دووشەممە لە راپۆرتێكدا بڵاویكردەوە، ئەو لێكۆڵەرەوانەی لە لایەن ئەنجومەنی مافەكانی مرۆڤی نەتەوە یەكگرتووەكانەوە لە مانگی سێی ساڵی 2017 ڕاسپـێردران بۆ لێكۆڵینەوە لە ڕەوشی ڕۆهینگییەكان، گەیشتنە ئەو ئەنجامەی سوپای میانمار و هێزی ئاسایشی دیكەی ئەو وڵاتە لە هەرێمەكانی كاچین و ڕاخین و شان بە چەندان شێوە مافەكانی مرۆڤیان پـێشێلكردووە.
بەپـێی ڕاپـۆرتەكە، ئەو هێزانەی سەر بە دەوڵەتی میانمار بەبێ جیاوازی ڕۆهینگییەكانیان بێ‌سەروشوێن كردووە و ئەشكەنجەیان داون و كوشتوویانن و دەسـتدرێژی سێكسیان كردووەتە سەر ژنانیان و لە منداڵەكانیان داون و گوندیان بە تەواوی سووتاندوون.
لەراپۆرتەكەدا هاتووە، هێندە بەڵگە هەن بەسە بۆ ئەوەی گەورە بەرپـرسانی سوپای میانمار لەسەریان دادگایی بكرێن لە لایەن دادگایەكی تایبەتەوە تاوەكو بڕیار بدرێت ئەوەی لە هەرێمی ڕاخین كردوویانە جینۆسایدە.
لێكۆڵەرەوان لیستێكیان ئامادەكردووە بە ناوی ئەو كاربەدەستانەی بەرپـرسی سەرەكین لە پـێشێلكاریـیەكان، لەوانە ژەنڕاڵ مین ئۆنگ هلاینگ سەرۆكی سوپا و 5 ژەنەڕاڵی دیكەی باڵا.
ڕاپـۆرتەكە ڕەخنەی توندیش لە ئونگ سان سوو كی، سەرۆكی حكومەتی میانمار دەگرێت كە پـۆستەكەی و دەسەڵاتەكانی خۆی بەكارنەهێناوە بۆ ڕێگەگرتن لە پـێشێلكاریـیەكانی لە هەرێمی ڕاخین كراون.
ه.م
سەیری ڤیدیۆکە بکەن
به‌روار: 27/08/2018
841 جار خوێندراوه‌ته‌وه
|