وتاره‌كان
راپەڕينی خەڵكی ئێران و ستراتيژييەكی راست و درووست!
 عەبدولڕەحمان مهابادی

 نووسەر و لێكۆڵەری سياسی

ئەگەرچی هێشتا زووە ليستەيەك لە ئەگەرەكان تايبەت بە پيلانگێرانی رژێمی ئێران بۆ بەلاڕێدابردنی رێڕەوی راپەڕينی قارەمانانەی خەڵكی ئێران باس بكرێت بەڵام لەوەدا گومان نيە كە رژێمی ئێران و پشتيوانانی نێودەوڵەتيی ئەم رژێمە ئەوەندەی لە دەستيان بێت لەوە درێغی ناكەن کە بۆشايی و درز بخەنە ناو پەيوەنديی نێوان خەڵكی راپەڕیو و هێزی پێشەنگ و بەمجۆرە شكست بە راپەڕين بهێنن!

ئێستا لێرە و لەوێ باس لەوە دەكرێت كە ئەم راپەڕينە بێ رەگ و ريشەيە و هەلقوڵاوی كۆمەڵ نيە و پاش ماوەيەك دادەمركێت. ئەوان دەيانەوێت وا نيشان بدەن كە راپەڕين بێ رێبەر و بێ سەركردەیە و بۆ ئەم پيلانەش سيناريۆگەلێكيان ئامادە كردووە تا بە رێگەی هەڕەشەكردن ياخود تەماح وەبەرنان بيگرنەوە. پشتيوانانی نێودەوڵەتيی رژێمی ئێرانيش هاوكات لە هەوڵی ئەوەدان كە بۆ ئەم راپەڕينە ”سەر” و ”سەركردە” و ”رێبەر” داتاشن و بەمكارەيان، راپەڕينەکە لە ئامانجی راستەقينەی خۆی كە ”روخاندنی رژێمی مەلاكان”ە دوور بخەنەوە و هەروەك چۆن لە ساڵی 1979 خومەينی سواری شەپۆلی راپەڕين بوو، ئاوهاش سواری راپەڕينی ئەمجارە ببنەوە. بەڵام ئايا ئەوە بۆيان سەردەگرێت؟! هەرگيز!

چون خەڵك و راپەڕينە مەزنەكەيان هەڵگری خواست و داواكارييەكی رەسەنە كە تەنها چەند كاتژمێر دوای دەستپێكی راپەڕين، لە سەراسەری ئێران دەنگی دایەوە. داواكارييەکی رەسەن کە ”سەرانی دەسەڵاتدار” سەرەوخۆار ئەكات و ”سەرانی ساخته”ش هەرگيز بەرگەی وڵامدانەوەی ناگرن. چون خەڵك خوازياری رووخاندنی ئەو دەسەڵاتەيە كە بە ناڕەوا بۆ ماوەی چوار دەيەيە خۆی بەسەر ئێران دا فەڕز كردووە و ”سەرانی ساختە”ش و "نە" دەتوانن و "نە" دەيانەوێت ئەم داواكارييە سەرەكييەی گەل جێبەجێ بكەن. چون بۆ گەيشتن بەو ئامانجە مەزنە، نرخێكی زۆر دراوە و داواکارییەکە هەڵقوڵاوی چوار دەيە خەباتی بێوچانی گەل و موقاومەتی ئێران بووە و ئێستا بەرەو ئەوە هەنگاو دەنێت كە لە لايەن كۆمەڵگای نێودەوڵەتييەوە بەفەرمی بناسرێت.

خامنەئی رێبەری مەلا دەسەڵاتدارەكان كە بە تەواوی بە هۆی راپەڕينی گەل پەشۆكابوو، دوای تێپەڕبوونی 5 رۆژ بەسەر دەستپێكی راپەڕيندا، بە تايبەت دەربارەی راپەڕين تەنها ئەوەی وت كە ”هەندێك قسەم هەيە كە لە كاتی خۆيدا باسی دەكەم!”. ئەم وتەيە زۆر له وتەكەی خومەينی دەچێت كاتێ رێككەوتننامەی 598 لە ساڵی 1988 لە كۆتايی شەڕی نێوان ئێران و عێراقی قبووڵ کرد و وتبووی هەڵقوڕاندنی جامی ژەهری ئاگربەستم قبوڵ كرد. خومەينی لەو نامەيەدا هيچ ئاماژەی بەوە نەدا كە هۆی خواردنی ئەم ژەهرە چييە و كێ ناچاری كردووە ئەم كارە بكات تا پاشەكشە بكات لە بەردەوام بوون لە شەڕ. بەڵام وتی هەندێك قسەم هەيە لە كاتی گونجاودا باسی دەكەم. بەڵام زۆری نەخاياند كەسە نزيكەكانی خومەينی وتيان و نووسييان كە خومەينی دەركی بەوە كردبوو كە ئەگەر خواردنی ئەم ژەهرە قبووڵ نەکردبایە زۆر بە خێرايی رژێمەيەكەی لە سەر دەستی "ئەڕتەشی ئازاديبەخشی ميللی"وە دەڕووخێت. لەم سۆنگەوە دەكرێت خوێندنەوە بە ئەو وتەیەی خامنەئيش بکرێت!

خامنەئی بەر لە هەمووان لە مەسجی راپەڕينی ئەم دواييەی خەڵكی ئێران گەيشت بەڵام نەيدركاند! چون ئەگەر ئەمكارەی بكردبايە راپەڕی گڕی ئەگرت. خامنەئی دەنگی پێی راپەڕينكارانی ئەو موقاومەتەی بيست كە ئێستا ئامادەتر لە جاران و لە ناو خەڵك و لە سەراسەری شارەكانی ئێراندا لە بۆسە دان بۆ ئەۆەی "ستراتيژی هەزار ئەشڕەف" پيادە بكەن. بێ هۆ نيە كە كاربەدەستانی رژێم پەيتا پەيتا دێنە سەر شاشەی تەلەڤيزيۆنەكان و رادەگەيەنن كە موجاهيدينی خەلق لە پشت ئەم راپەڕينەوەن!

موقاومەتی ئێران كە موجاهيدينی خەلق هێزی سەرەكييە تيايدا، دوای داگيركردنی كامپی ئەشڕەف لە ساڵی 2013 و دوای قەتڵوعامكردنی دانيشتووانی ئەو کامپە لە يەكەم رۆژی مانگی سێپتامبەردا، ستراتيژيی ”هەزار ئەشڕەف”يان راگەياند تا لە ناو ئێران ئەشڕەف بڵاو بكەنەوە و بەو رێگەوە رووخاندنی رژێمی مەلاكان بەدی بهێنن کە ئێستا لەم راپەڕينەدا، بەری يەكەمی بەرچاو دەكەوێت.

دەكرێت راست و درووست بوونی ئەم ستراتيژييە لە زمان  )نيوت گينگريچ)ەوە ببيستين كە لە كۆبوونەوەی ساڵانەی موقاومەتی ئێران لە كۆتايی مانگی جولای رابردوو وتی: ”ئێوە بە ئازايەتی و فيداكاری و بەڵێنداريتان، بە قسەكردن لەگەڵ ئەم و ئەو، سوپايەكتان پێکهێناوە كە لە سوپای وڵاتەكەی ئێمه، کاتێ بۆ سەربەخۆيی ئەمريكا خەباتمان دەكرد، گەورەترە.. ئێمە هەڵگری ئەو ئۆمێدەين كە لە ستراتيژی ”هەزار ئەشرەف” خۆی دەردەخات. ئەوەش ئەو پوتانسيەلەيە كە كاتێ جارێكيتر سەرهەڵدان لە ناو ئێران روو بدات، بە شێوازێكی رێكخراو خۆی لە سەراسەری ئێران دەردەخات”.

ئێستا دەكرێت ئەم راستييە بنەڕەتييە گرێ بدەين بە تايبەتمەندييەكانی راپەڕينەكەی ئەمدواييەوە. راپەڕينی ئەمجارە زۆر جياوازە لە راپەڕينەكانی رابردوو كە خاڵە هەرە سەرەكييەكانی بريتين لە: بەربڵاوبوونی جوغرافيايی و كۆمەڵايەتی، خێرايی، بە تايبەت لە گواستنەوەی داواكارييەكان بۆ دواكاريی سياسی كە تەنها دوای چەند كاتژمێر، درووشمەكانی راپەڕين كرا بە درووشمی ”مەرگ بۆ ديكتاتۆر، مەرگ بۆ خامنەئی و مەرگ بۆ روحانی. هەروەها درووشمی ”ئوسولگەرا و ئيسڵاحگەرا.. ئيتر كۆتايی هات ماجەرا” كە تەواوەتی رژێمی كردە ئامانج و پلانی كۆنەرپەرستی_ئيستيعماری بۆ گەڕان بە دوای دۆزينەوەی ريفۆرميست و ئيسڵاحی لەنا دەسەڵاتی بە تەواوی پووچەڵ كردەوە.

دواوتە، هەموو چين و توێژەكانی كۆمەڵانی خەڵك و لايەنە سياسييەكانی ناو بەرەی گەل و بە تايبەت راپەڕينكاران لە سەراسەری ئێرانی داگيركراو، دەبێ وريا بن لە ئاست پلان و سيناريۆكانی كۆنەپەرستی-ئيستيعماری بۆ بەلاڕێدابردنی ئامانجەکانی راپەڕين و ئەوەش پێويستی بە پتەوكردنی پێۆەنديی قووڵی نێوان گەل و موقاومەتی ئێران هەیە.

Abdorrahman.m@gmail.com

 ئەم ووتارە گوزارشت  لە بۆچونی  نووسەرەکەی دەكات

به‌روار:  13/01/2018
145   جار خوێندراوه‌ته‌وه
  وتاری زیاتر ...
پارێزەر: لوقمان مصطفی صالح
عەبدولڕەحمان مهابادی
پارێزەر: لوقمان مصطفی صالح
ئازاد حەمدی
ژماره‌ی بابه‌ت
ماڵئاوایی کەرەکان لە هاوڕێیەکیان😥😥😥
شیری ماکەری ئێرانی
بۆ ساڵیادی تیرۆری سەرکردەی شەهید دکتۆر قاسملۆ
سووتانی 13 کەس لە سنە بەهۆی تەنکەرێکی نەوتەوە
ڤیدیۆیەکی جوان و ناوازە
مافەکان پارێزراوە بۆ مالمۆکورد
میوانی سه‌رهێڵ:   88
کۆی سه‌ردان:   16970648